Tvær konur frömdu sjálfsmorðssprengjuárásir í flóttamannabúðum í Nígeríu í gærmorgun, þar sem fólk á flótta undan Boko Haram hryðjuverkasamtökunum dvelur. Minnst 56 létust en fórnarlömbin, mestmegnis konur og börn, biðu í röðum eftir því að vera úthlutað mat. Tugir til viðbótar særðust, margir alvarlega.
Þriðja konan hætti við að sprengja sig í loft upp og gaf sig fram við yfirvöld eftir að hún áttaði sig á því að ættingjar hennar voru í búðunum.
Dikwa flóttamannbúðirnar sem um ræðir eru í Borno héraði í norðausturhluta Nígeríu. Þær hýsa um 50.000 manns sem hafa flúið heimili sín eftir að Boko Haram náðu völdum á svæðinu en hersveitir Nígeríu hafa sótt gegn samtökunum að undanförnu. Samtökin mega sín lítils í beinum átökum við herinn en hafa í auknum mæli gert árásir á óbreytta borgara.
Á sex árum hafa árásir Boko Haram kostað um 20.000 manns lífið og hrakið tvær milljónir frá heimilum sínum.