Leiðbeinandi í slagsmálaíþróttum myrti fyrrverandi kærustu sína, systur hennar og ömmu þeirra í Argentínu í dag.
Þetta þrefalda morð var framið einum degi eftir að fjöldamótmæli fóru fram í landinu vegna fjölda kvenna sem hafa verið myrtar í landinu að undanförnu.
Maðurinn, sem er þrítugur, var vopnaður byssu og hnífi þegar hann ruddist inn á heimili fyrrverandi kærustu sinnar í bænum Godoy Cruz. Hann drap konurnar þrjár og særði sjö mánaða stúlku og ellefu ára dreng, að sögn lögreglunnar.
Maðurinn ætlaði því næst að kveikja í húsinu með því að opna fyrir gasið en lögreglunni tókst að koma í veg fyrir sprengingu. Hann var síðan handtekinn.
Stutt er síðan þúsundir argentískra kvenna efndu til mótmæla vegna grimmilegrar nauðgunar og morðs á 16 ára stúlku.
Frétt mbl.is: Í verkfall vegna nauðgunar og morðs
Fleiri mótmæli hafa farið fram í Argentínu og í öðrum löndum vegna ofbeldis í garð kvenna undanfarin misseri.