Erlent | mbl | 2.2.2017 | 14:45 | Uppfært 16:00

„Í stríð við Kína á næstu tíu árum“

Donald Trump óskar Bannon til hamingju með nýju ráðgjafastöðuna, degi eftir embættistöku sína. AFP

Setja bókamerki

Suður-Kínahaf

Hafsvæðið er að stærstum hluta autt, utan fjölda smáeyja og -kletta sem ekki henta til búsetu.
Undantekningar eru Parcels eyjar í norðri og Spratlys eyjar í suðri
Kínverjar hafa að auki verið iðnir við að reisa gervieyjar á svæðinu til að styrkja tilkall sitt.
Þau ríki sem liggja að Suður-Kínahafi gera öll tilkall til hluta hafsvæðisins, m.a. Víetnam, Malasía, Filippseyjar, Brúnei, Taívan og Kína.
Vísindamenn telja að áður ónýttar auðlindir, m.a. gas og olía, kunni að leynast á sjávarbotninum.

Steve Bannon

Bannon er 62 ára, fyrrverandi yfir maður í hernum og starfsmaður á fjárfestingasviði Goldman Sachs bankans.
Bróðurpart síðasta áratugar stóð Bannon í brúnni á hægrisinnuðu frétta- og skoðanasíðunni Breitbart.
Fréttasíðan er vinsæl meðal íhaldsmanna en hefur verið gagnrýnd fyrir að ala á kynþáttafordómum, kvenfyrirlitningu og gyðingahatri
Einkalíf Bannons varð fréttamatur á tíunda áratugnum er fyrrverandi eiginkona hans sakaði hann um heimilisofbeldi. Kæran var síðar látin niður falla.
Bannon hefur verið mjög gagnrýninn á stefnu Repúblikana og hefur viljað að flokkurinn færði sig enn lengra til hægri í stefnumálum sínum.
Hann hefur hrósað þremur frammákonum í flokknum, m.a. Söruh Palin, fyrir að vera „kvenlegar“, vera giftar og styðja fjölskyldugildin en ekki vera „hópur af lessum“ [e. bunch of dykes].
Hann tók við sem kosningastjóri Trumps undir lok kosningabaráttunnar, og starfar nú sem aðalráðgjafi hans í Hvíta húsinu.

Bandaríkin og Kína munu heyja stríð á næstu tíu árum vegna eyja í Suður-Kínahafi, og um það er enginn vafi. Á sama tíma munu Bandaríkin vera í öðru meiriháttar stríði í Mið-Austurlöndum.

Þetta er skoðun manns, sem af mörgum er nú talinn einn sá valdamesti í bandarísku stjórnkerfi. Steve Bannon, sem áður stýrði hægrisinnaða fréttavefnum Breitbart, og er nú aðalráðgjafi Donalds Trump Bandaríkjaforseta, lét ofangreind orð falla í mars á síðasta ári.

Frétt mbl.is: Hægri höndin eykur vald sitt

Bannon gegnir aðalhlutverki

Á þeim tveimur vikum sem liðnar eru síðan Trump tók við embætti forseta, hefur Bannon gegnt aðalhlutverki í ákvörðunum hans.

Þannig var hann skipaður í aðalnefnd þjóðaröryggisráðsins og átti mikinn þátt í tilskipun forsetans um ferðabann ríkisborgara sjö ríkja til Bandaríkjanna.

Í útvarpsþáttum sem hann stýrði fyrir Breitbart sagði hann ljóst hverjar helstu ógnir við Bandaríkin væru.

„Við munum fara í stríð í Suður-Kínahafi eftir fimm til tíu ár. Það er enginn vafi um það. Þeir eru að taka sandrif og gera úr þeim einfaldlega kyrrstæð flugmóðurskip, og láta eldflaugar þar ofan á,“ sagði hann meðal annars, að því er fram kemur í umfjöllun The Guardian.

Bannon á leið til embættistöku Trumps fyrr í mánuðinum. AFP

Hunsa úrskurð Alþjóðadómstólsins

Stjórnvöld Kína hafa um nokkurt skeið fullyrt að allt Suður-Kínahaf sé innan yfirráðasvæði þess, en sex önnur ríki gera einnig tilkall til hluta svæðisins. Kína hefur þá einnig reist þar fjölda gervieyja á sandrifjum og skerjum, til að styrkja stöðu sína á svæðinu, lagt á þær flugbrautir fyrir herflugvélar og komið upp loftvarnabyssum.

Gerðardómstóll við Alþjóðadómstólinn í Haag hafnaði í júlí tilkalli Kínverja til Suður-Kínahafs, en stjórnvöld á Filippseyjum höfðu óskað eftir úrskurði dómstólsins.

Í úrskurðinum sagði að það engar sannanir væru fyrir því að Kína geti út frá sögulegu samhengi gert tilkall til hafsvæðisins og þeirra auðlinda sem þar kunna að finnast.

Kínversk stjórnvöld létu þó ekki þar við sitja. Í yfirlýsingu frá kínverska utanríkisráðuneytinu, degi eftir að úrskurðurinn féll, sögðust þau ekki viðurkenna lögsögu dómstólsins í málinu og að úrskurðurinn yrði virtur að vettugi.

Frétt mbl.is: Kínverjar hunsa úrskurðinn

„Kristna vestrið á undanhaldi“

Skoðanir Bannons, og staða hans í innsta hring Trumps, hafa aukið á ótta um hernaðarátök við Kína, ekki síst eftir að nýskipaður utanríkisráðherra Bandaríkjanna, Rex Tillerson, sagði að Bandaríkin myndu meina stjórnvöldum Kína aðgang að þeim sjö gervieyjum sem þau hafa búið til í Suður-Kínahafi.

Sérfræðingar vöruðu um leið við því að nokkrar athafnir í þá veru myndu leiða til stríðs.

Frétt mbl.is: Trump sagður hætta á kjarnorkustyrjöld

Bannon geldur augljóslega varhug við vaxandi áhrifum Kína í Asíu og víðar, og virðist um leið líta á stjórnvöld þess sem hreina og klára andstæðinga Bandaríkjanna.

„Þú ert með Íslam á mikilli uppleið, og sömuleiðis Kína. Ekki satt? Og þau eru metnaðarfull. Þau eru hrokafull. Þau eru á hreyfingu. Og þau halda að kristna vestrið sé á undanhaldi,“ sagði hann í útvarpsþætti fyrir um ári síðan.

Á sama degi og Trump tók við embætti sínu, varaði kínverski herinn við því að stríð á milli landanna tveggja gæti átt sér stað á kjörtímabili Trumps.

Innan æðstu stjórna kjarnorkuveldanna, báðum megin Kyrrahafsins, virðist því horft á stríð sem raunhæfan möguleika.

Suður-Kínahaf

Hafsvæðið er að stærstum hluta autt, utan fjölda smáeyja og -kletta sem ekki henta til búsetu.
Undantekningar eru Parcels eyjar í norðri og Spratlys eyjar í suðri
Kínverjar hafa að auki verið iðnir við að reisa gervieyjar á svæðinu til að styrkja tilkall sitt.
Þau ríki sem liggja að Suður-Kínahafi gera öll tilkall til hluta hafsvæðisins, m.a. Víetnam, Malasía, Filippseyjar, Brúnei, Taívan og Kína.
Vísindamenn telja að áður ónýttar auðlindir, m.a. gas og olía, kunni að leynast á sjávarbotninum.

Steve Bannon

Bannon er 62 ára, fyrrverandi yfir maður í hernum og starfsmaður á fjárfestingasviði Goldman Sachs bankans.
Bróðurpart síðasta áratugar stóð Bannon í brúnni á hægrisinnuðu frétta- og skoðanasíðunni Breitbart.
Fréttasíðan er vinsæl meðal íhaldsmanna en hefur verið gagnrýnd fyrir að ala á kynþáttafordómum, kvenfyrirlitningu og gyðingahatri
Einkalíf Bannons varð fréttamatur á tíunda áratugnum er fyrrverandi eiginkona hans sakaði hann um heimilisofbeldi. Kæran var síðar látin niður falla.
Bannon hefur verið mjög gagnrýninn á stefnu Repúblikana og hefur viljað að flokkurinn færði sig enn lengra til hægri í stefnumálum sínum.
Hann hefur hrósað þremur frammákonum í flokknum, m.a. Söruh Palin, fyrir að vera „kvenlegar“, vera giftar og styðja fjölskyldugildin en ekki vera „hópur af lessum“ [e. bunch of dykes].
Hann tók við sem kosningastjóri Trumps undir lok kosningabaráttunnar, og starfar nú sem aðalráðgjafi hans í Hvíta húsinu.