Þjóðaröryggisráðgjafi Bandaríkjanna hefur beðið varaforsetann Mike Pence afsökunar á þeim ágreiningi sem samskipti hans við sendiherra Rússlands hafa valdið. Þetta segir í tilkynningu frá Hvíta húsinu.
Ráðgjafinn, Michael Flynn, hefur verið í brennidepli eftir að greint var frá því að hann hefði rætt um viðskiptaþvinganir Bandaríkjanna gagnvart Rússlandi við Sergei Kislyak, sendiherra Rússa í Bandaríkjunum, í aðdraganda embættistöku Trumps í janúar.
Samræður þeirra kunna að hafa brotið í bága við lög, sem banna óbreyttum borgurum að beita sér í utanríkismálum Bandaríkjanna.
Varaforsetinn Mike Pence hafnaði opinberlega öllum ásökunum þessa efnis fyrir hönd Flynn. En síðan þá hefur Flynn tjáð Pence að þvinganirnar kunni að hafa borið á góma.
Flynn var í fremstu röð á blaðamannafundi Trumps ásamt kanadíska forsætisráðherranum Justin Trudeau fyrr í dag. Trump var ekki spurður um málefni Flynn af þeim tveimur fréttamönnum sem fengu færi á að spyrja hann. Myndskeið af fundinum má sjá hér að ofan.
Talsmaður forsetans, Sean Spicer, sagði svo nú í kvöld að forsetinn væri að meta stöðuna. Sagði hann Trump vera að tala við varaforsetann og annað fólk, „um það sem hann telur mikilvægasta málefnið – þjóðaröryggi okkar.“