Erlent | AFP | 14.3.2017 | 13:05 | Uppfært 15.3.2017 5:18

Hundruð barna hafa örkumlast

Vannærður drengur í Jemen á sjúkrahúsi í höfuðborginni Sanaa. AFP

Um 7.700 manns hafa fallið í borgarastríðinu í Jemen frá því að bandamenn, með Sádi-Araba í broddi fylkingar, hófu afskipti af því fyrir tveimur árum. Meðal fallinna eru 1.564 börn.

Barnahjálp Sameinuðu þjóðanna, UNICEF, segir að 2.450 börn hafi örkumlast í stríðinu. Staðfest er að 1.022 drengir hafi dáið og 478 stúlkur. Á þessum tveimur árum hefur 1.801 drengur særst og 649 stúlkur. Þá voru 1.572 drengir gerðir að barnahermönnum.

Í mars árið 2015 hófu bandamenn loftárásir í landinu til stuðnings forsetanum Abedrabbo Mansour Hadi. Aðdragandinn var sá að uppreisnarmenn Húta, sem vildu koma Hadi frá völdum, höfðu gripið til vopna í baráttu sinni. Hútar njóta hins vegar stuðnings Írana.

Uppreisnarmenn Húta brutust til valda í höfuðborginni Sanaa í september árið 2014 og flæmdu Hadi í útlegð til borgarinnar Aden í suðurhluta landsins og síðar til Sádi-Arabíu.

Bandamenn og stjórnarherinn hafa nú flæmt uppreisnarmennina frá fimm héruðum í suðurhluta landsins sem þeir höfðu áður tekið á sitt vald. Þeirra á meðal er borgin Aden.

Heilbrigðisstofnun Sameinuðu þjóðanna, WHO, segir að 7.700 manns hafi látist í átökunum síðustu tvö ár. Þá hafi 42.550 særst.

Neyðarsöfnun Rauða krossins

Rauði krossinn á Íslandi tók í gær ákvörðun um að senda um 16,5 milljónir króna til Jemen í neyðaraðstoð vegna alvarlegs fæðuskorts. Jemen er það ríki sem býr við hvað verst mannúðarástand í heiminum öllum.

Samhliða hófst í gær neyðarsöfnun fyrir Suður-Súdan og Sómalíu vegna alvarlegs fæðuskorts og yfirvofandi hungursneyðar, en þegar hefur verið lýst yfir hungursneyð á afmörkuðu svæði í Suður-Súdan.

Hægt er að styrkja neyðarsöfnunina með því að senda SMS í númerið 1900 með orðinu TAKK og fara þá 1900 krónur af símreikningi. Auk þess er hægt að borga með AUR-appinu í númer 123 788 1717. Einnig er hægt að leggja inn á reikning 0342-26-12, kt. 530269-2649.