Að minnst kosti þrír fangar létust og einn er alvarlega slasaður eftir að eldur braust út í fangelsi í Mexíkó. Fangarnir kveiktu sjálfir eldinn í mótmælaskyni. Í þessu sama fangelsi, sem er í norðurhluta Mexíkó, sluppu að minnsta kosti 29 fangar út í gegnum 40 metra löng og fimm metra breið göng í vikunni. Fangarnir grófu sér leið út úr fangelsinu sem er í borginni Ciudad Victoria á Tamaulipas-svæðinu.
Fangarnir mótmæltu því að lögreglan girti af svæðið þar sem göngin eru og meinaði þeim aðgang að. Í mótmælaskyni skutu fangarnir úr byssum, brenndu lök og létu ófriðlega með fyrrgreindum afleiðingum. Fangelsið er nú undir ströngu eftirliti, að sögn talsmanns fangelsisins.
Aðstaðan í þessu fangelsi er með því versta sem þekkist í Mexíkó. Fangarnir sjálfir stýra lögum og lofum og eru jafnvel með sýnilega verslun innan múra fangelsisins.
Fangelsi í Mexíkó eru undirfjármögnuð, allt of margir fangar eru í fangelsum landsins sem leiðir til mikilla óeirða og uppþota bæði milli fanganna sjálfra og við fangaverði og í ofanálag eru flóttatilraunir tíðar og yfirvöld eiga erfitt með að ná tökum á ástandinu.
Af þessum 29 föngum sem flúðu á fimmtudaginn síðastliðinn náðust 12 þeirra fljótlega aftur og einn náðist í dag. Fangarnir myrtu að minnsta kosti einn á flóttanum þegar þeir stálu bíl til að komast undan.
Á þessu svæði sem er nálægt landamærum Bandaríkjanna liggur þekkt smyglleið eiturlyfja yfir til Bandaríkjanna. Á svæðinu takast glæpagengi á um yfirráð yfir eiturlyfjasmyglleiðum til Bandaríkjanna.
Hér fyrir neðan má sjá göngin sem þeir grófu.