Ekkert er til í fullyrðingum um að Donald Trump Bandaríkjaforseti hafi deilt viðkvæmum og leynilegum upplýsingum um hryðjuverkasamtökin Ríki íslams með utanríkisráðherra Rússlands. Þetta hefur rússneska Interfax-fréttastofan eftir rússneska utanríkisráðuneytinu.
Segir í frétt Interfax að um „falska frétt“ sé að ræða.
Bandaríska dagblaðið Washington Post greindi frá því í gær að atvikið hefði átti sér stað þegar Trump fundaði með Sergei Lavrov, utanríkisráðherra Rússlands, og Sergiei Kislyak, sendiherra Rússa í Bandaríkjunum, í Hvíta húsinu í Washington í síðustu viku.
Upplýsingarnar komu frá bandamanni Bandaríkjanna sem hafði ekki gefið bandarískum stjórnvöldum leyfi til að deila þessum upplýsingum með Rússum.
Talsmenn forsetans hafa neitað ásökununum.