Rússnesk stjórnvöld hafa vísað fregnum á bug um að tölvuhakkarar á vegum rússnesku leyniþjónustunnar hafi reynt að brjótast inn í kosningakerfin sem voru notuð í bandarísku forsetakosningunum í fyrra.
„Fyrir utan þessar fregnir, sem eiga ekki við nein rök að styðjast, höfum við ekki séð neinar upplýsingar eða heyrt nein rök sem styðja við bakið á þessum upplýsingum,“ sagði Dmitry Peskov, talsmaður rússneskra stjórnvalda í Kreml.
„Við vísum harðlega á bug þeim möguleika að þetta hafi getað gerst,“ sagði hann.
Talið er að skýrslu Þjóðaröryggistofnunar Bandaríkjanna hafi verið lekið rúmum mánuði eftir að hún var skrifuð.
Í skýrslunni er lýst aðgerð sem tengist náið leyniþjónustu rússneska hersins (GRU) sem beindist gegn bandarískum einkafyrirtækjum og fólst hún í því að reyna að komast yfir upplýsingar um hug- og vélbúnað kjörkerfisins í kosningunum.