Það eru meira en 1.200 dagar í næstu forsetakosningar í Bandaríkjunum en Donald Trump er þegar farinn að safna. Í kvöld mun hann sitja fjáröflunarkvöldverð í þágu Repúblikanaflokksins og hans eigin kosningaherferðar en viðburðurinn fer fram á Trump International Hotel í Washington; aðeins steinsnar frá Hvíta húsinu.
Kvöldverðurinn kostar 35.000 dali á haus, það eru 3,6 milljónir króna.
Mörgum þykja fjáraflanir af þessu tagi „óþægilegar“ en staðreyndin er sú að það hefur löngum tíðkast að sitjandi forseti sæki viðburði á borð við þennan, hvort sem er til að safna fyrir flokkinn eða sjálfan sig.
Þegar um er að ræða viðskiptajöfurinn Donald Trump flækjast hins vegar málin; þeir sem mæta í kvöld munu ekki eingöngu leggja kosningabaráttu hans lið heldur einnig Trump-viðskiptaveldinu.
Þrátt fyrir að forsetinn hafi falið sonum sínum daglegan rekstur á Trump enn sinn hlut í Trump-merkinu, óskertan. Vegna þessa hafa um 200 þingmenn Demókrataflokksins höfðað mál á hendur forsetanum en þeir segja hann brjóta gegn stjórnarskránni með því að þiggja greiðslur erlendis frá í gegnum hótel- og golfrekstur sinn.
Þá hefur annað mál verið höfðað af yfirvöldum í Maryland og Washington en þau vilja meina að Trump International Hotel, sem opnaði nokkrum vikum fyrir forsetakosningarnar, njóti verulegs forskots umfram önnur hótel vegna tengsla sinna við Hvíta húsið.