Donald Trump Bandaríkjaforseti er opinn fyrir því að undirrita löggjöf um hertar refsiaðgerðir gegn Rússum, að sögn fjölmiðlafulltrúa Hvíta hússins.
Samkomulag náðist í gær á milli þingflokka repúblikana og demókrata í Bandaríkjunum um nýja löggjöf sem veitir stjórnvöldum auknar heimildir til að refsa Rússum fyrir meint afskipti af bandarísku forsetakosningunum á síðasta ári.
Nýja löggjöfin takmarkar jafnframt heimildir Donalds Trump Bandaríkjaforseta til að aflétta hvers kyns refsiaðgerðum sem bandarísk stjórnvöld hafa samþykkt að beita gegn yfirvöldum í Rússlandi. Refsiaðgerðirnar sem þingflokkarnir náðu saman um taka einnig til Írans og Norður-Kóreu.
Reuters segir stjórn Trumps hafa skipt um skoðun á frumvarpinu, sem forsetinn var áður mótfallinn. Er hugarfarsbreytingin sögð hafa orðið eftir að þær breytingar voru gerðar á frumvarpinu að það tekur nú líka til refsiaðgerða gegn Norður-Kóreu. Stjórnin muni þó ekki gera endanlega upp hug sinn varðandi frumvarpið fyrr en endanleg útgáfa þess liggur fyrir.
Trump hefur mætt andstöðu þingmanna bæði Repúblikana- og Demókrataflokksins vegna tilrauna sinna til að bæta samskiptin við ráðamenn í Rússlandi. Hafa meint afskipti Rússa af forsetakosningunum sem og samskipti starfsmanna framboðs Trumps haft töluverð áhrif þar á.
Segir Reuters að með frumvarpinu nú vilji þingmenn refsa Rússum fyrir innlimun Krímskaga árið 2014 og fyrir meint afskipti sín af forsetakosningunum. Pútín hefur alfarið neitað því að rússnesk stjórnvöld hafi haft nokkra aðkomu að kosningunum.
Stjórn Trumps hefur á undanförnum vikum fundað með þingmönnum til að mótmæla vissum hlutum frumvarpsins, m.a. því að forsetinn þurfi samþykki þingheims áður en hann afléttir refsiaðgerðum.
„Við styðjum frumvarpið eins og það er nú og munum halda áfram að vinna með fulltrúa- og öldungadeildinni til að koma á refsiaðgerðum gegn Rússum þar til staðan í Úkraínu hefur verið leyst, sem hún svo sannarlega er ekki núna,“ sagði Sarah Sanders fjölmiðlafulltrúi Hvíta hússins í viðtali á ABC-sjónvarpsstöðinni.