Hvarf Kim Wall: Hvað vitum við?

Peter Madsen, til hægri, ræðir við lögreglumann í gærdag.
Peter Madsen, til hægri, ræðir við lögreglumann í gærdag. AFP

Danska lögreglan leitar enn sænskrar blaðakonu sem hvarf í kjölfar kafbátsferðar undan ströndum Danmerkur á fimmtudag. Enginn fannst um borð í kafbátnum Nautilus sem var hífður upp af botni Eyrarsunds á laugardag.

Blaðakonan er þrítug og heitir Kim Wall, en hún hafði verið að vinna að grein um eiganda kafbátsins, hinn 46 ára Peter Madsen, sem fór með henni í kafbátinn á fimmtudag.

Frétt mbl.is: Blaðakonan fannst ekki í kafbátnum

Madsen hefur verið ásakaður um manndráp af gáleysi og var í gærdag úrskurðaður í gæsluvarðhald í 24 daga. Hann hefur neitað sök í málinu.

Danska ríkisútvarpið hefur tekið saman í tímalínu allt sem vitað er um atburði undanfarinna daga. Birtist samantektin hér í þýðingu mbl.is:

Fimmtudagur klukkan 19.00: Kafbáturinn leggur frá bryggju á Refshaleøen í prufusiglingu. Um borð eru Madsen og Wall, sem hyggst skrifa grein um kafbátinn og eiganda hans.

Fimmtudagur klukkan 20.30: Yfirvöld í Danmörku fá boð frá skemmtiferðaskipi um að kafbáturinn hafi sést sigla út úr höfn Kaupmannahafnar. Þar á eftir má sjá kafbátinn sigla í kringum Drogden-vitann, suðaustur af Kaupmannahöfn.

Föstudagur klukkan 2.30: Boð berast frá kærasta Wall um að kafbáturinn hafi ekki snúið aftur í höfnina. Snemma að morgni föstudagsins hefst leitin að Nautilus og herðist enn frekar eftir því sem líður á daginn. Óskað er eftir hjálp frá Svíþjóð við leitina.

Ekkert hefur spurst til Wall frá því á fimmtudag.
Ekkert hefur spurst til Wall frá því á fimmtudag. AFP

Föstudagur klukkan 10.30: Til kafbátsins sést við Drogden-vita í Køge-flóa. Danski herinn nær sambandi við Peter Madsen, sem í gegnum slæmt fjarskiptasamband segir að ástæðu löngu siglingarinnar og sambandsleysis megi rekja til „tæknilegra örðugleika“.

Þá segist hann munu reyna að sigla kafbátnum til hafnar. Fyrstu skilaboð hans gefa þá til kynna að þau bæði séu um borð í bátnum, en í ljós kemur síðar meir að hann er aðeins einn um borð.

Föstudagur klukkan 11.00: Madsen stígur frá borði og yfir í vélbát. Aðeins stuttu síðar sekkur Nautilus til botns á um sjö metra dýpi. Sjálfur siglir Madsen til Dragør-hafnar.

Síðar um daginn tilkynnir sænska lögreglan hvarf Wall. Segir í tilkynningunni að hún sé 160 sentimetrar að hæð, 56 kíló, 30 ára, með rauðbrúnt hár og græn augu. Þá sé hún í appelsínugulri blússu með löngum ermum, svarthvítu blómapilsi, nælonsokkabuxum og hvítum tennisskóm.

Föstudagur klukkan 17.44: Kaupmannahafnarlögreglan tilkynnir að Madsen sé ákærður fyrir að hafa myrt Wall. Sjálfur neiti hann sök. Samkvæmt lögreglunni segist hann hafa látið Wall í land við odda Refshaleøen, nálægt veitingastaðnum „Halvandet“, um klukkan 22.30 kvöldið áður.

Lögreglan lýsir um leið eftir vitnum sem geti hafa séð bátinn fara úr höfninni um klukkan 19 eða séð hann koma aftur að Refshaleøen klukkan 22.30. Enn fremur er óskað eftir vitnum sem séð hafi Wall á eyjunni um þetta leyti.

Kafarar eru þá sagðir hafa verið sendir niður að bátnum, en þeir hafi ekki getað komist inn í hann.

Kafbáturinn Nautilus hífður á land.
Kafbáturinn Nautilus hífður á land. AFP

Laugardagur klukkan 10.00: Kaupmannahafnarlögreglan tilkynnir á Twitter að hafist hafi verið handa við að hífa kafbátinn upp af hafsbotni. Á sama tíma er ákæran lesin upp yfir Madsen, en í henni er honum gefið að sök að hafa orðið Wall að bana með ókunnum hætti, einhvern tíma eftir klukkan 19 á fimmtudeginum. Hann lýsir yfir sakleysi sínu.

Laugardagur klukkan 16.45: Peter Madsen er úrskurðaður í varðhald til 5. september.

Laugardagur klukkan 18.50: Lögreglan segir að leit í kafbátnum muni fara fram yfir nóttina og fram á sunnudag. Enn er ekki vitað hvað er um borð í bátnum.

Sunnudagur klukkan 11.30: Engin manneskja fannst á bátnum - hvorki látin né lifandi, segir Jens Møller, sem fer fyrir rannsókn málsins. Útlit er fyrir að bátnum hafi verið sökkt af ásettu ráði. Leit heldur áfram að Kim Wall í og við Eyrarsund.

Frétt mbl.is: Blaðakonan fannst ekki í kafbátnum

mbl.is

Frá Sýrlandi til Evrópu - Greinaflokkur

* Öll stærstu á einum stað
Þú getur spilað með í yfir 50 stærstu Lottóum heimsins. Í yfir 12 ár hafa lottó...
Bækur til sölu
Eylenda 1-2, Úlfljótur ‘47-’70. ib, Grettissaga 1946, Sagnahver Bj. Bj., Viðfi...
Skrifstofuhúsnæði - hagstætt leiguverð.
Til leigu er 197 ferm. skrifstofuhúsnæði við Bíldshöfða. Skiptist í móttöku, fim...
Framlenging á brunn og lok og hringur
Framlegnging á 60 cm skolpbrunn, einnig brunnlok, þolir mikinn þunga og rammi eð...
 
Félagsstarf
Staður og stund
Árskógar Opin smíðastofa kl. 9-15. Opið ...
Félagsstarf
Staður og stund
Árskógar Hádegismatur, mexíkanskur hakkr...
Framhald uppboðs
Nauðungarsala
Uppboð Einnig birt á www.naudungarsolu...
Háseti
Sjávarútvegur
Háseti Vísir hf óskar eftir a...