Þriggja ára stúlka er sögð yngsta fórnarlamb hryðjuverkaárásarinnar í Barcelona í gær og þá er sex ára stúlka alvarlega slösuð vegna blæðinga í heila að því er fram kemur á vef Guardian.
13 manns létust og rúmlega hundrað slösuðust þegar sendiferðabifreið var ekið á hóp gangandi vegfarenda á Römblunni í Barcelona í gærdag og eru þeir sem ýmist létu lífið eða særðust frá 24 þjóðlöndum að sögn lögreglu.
Þrír hafa verið handteknir í tengslum við rannsókn málsins, en lögregla leitar þó enn ökumanns bílsins.
Fórnarlömbin eru meðal annars frá Frakklandi, Þýskalandi, Spáni, Hollandi, Argentínu, Venesúela, Belgíu, Ástralíu, Ungverjalandi, Perú, Rúmeníu, Írlandi, Grikklandi, Kúbu, Makedóníu, Kína, Ítalíu og Alsír samkvæmt upplýsingum frá talsmanni stjórnvalda í Katalóníu.
Ekki er vitað til þess að Íslendingar séu í hópi fórnarlamba árásarinnar.
Talið er að þrír hinna látnu séu Þjóðverjar og utanríkisráðherra Belga hefur staðfest að einn Belgi hafi farist í árasinni.
Þá hafa frönsk yfirvöld greint frá því að 26 Frakkar hafi særst í árásinni, þar af 11 alvarlega.
Fjórir Ástralar eru einnig í hópi hinna særðu og er ástand tveggja ástralskra kvenna alvarlegt.
Farið var að dreifa myndum af særðu og látnu fólki á samfélagsmiðlum fljótlega eftir árásina og voru slíkar myndbirtingar harðlega gagnrýndar. Í einhverjum tilfellum gæti fólk verið að fá fyrstu fréttir af slösuðum eða látnum ástvinum sínum með þeim hætti.