Donald Trump Bandaríkjaforseti hefur hótað því að leggja sérstakan toll á innflutta bíla frá löndum í Evrópusambandinu, ætli það sér að breyta viðskiptastefnu sinni vegna fyrirhugaðrar tolllagningar Bandaríkjanna á innflutt stál og ál.
Trump tilkynnti í fyrradag að 25% tollur yrði lagður á innflutt stál og 10% á innflutt ál. Ákvörðunin vakti hörð viðbrögð og sagði utanríkisráðherra Þýskalands, Sigmar Gabriel, að Evrópusambandið yrði að svara forsetanum í sömu mynt.
Í færslu á Twitter sem fréttavefur CNBC greinir frá segir Trump að ef ESB ætlar í hart muni Bandaríkin svara með því að leggja tolla á innflutta bíla.
„Ef ESB vill auka tolla og hindranir á bandarísk fyrirtæki, sem eru nógu há fyrir, munum við einfaldlega leggja toll á bílana þeirra sem flæða inn í Bandaríkin.“
If the E.U. wants to further increase their already massive tariffs and barriers on U.S. companies doing business there, we will simply apply a Tax on their Cars which freely pour into the U.S. They make it impossible for our cars (and more) to sell there. Big trade imbalance!
— Donald J. Trump (@realDonaldTrump) March 3, 2018
Tolllagning á innflutta bíla gæti komið sér illa fyrir bílaframleiðendur eins og Volkswagen og BMW sem eru vinsælustu evrópsku bílarnir á Bandaríkjamarkaði. Yfir milljón bílar voru fluttir frá Evrópu til Bandaríkjanna á árinu 2016.