Erlent | mbl | 29.1.2021 | 15:29

Samþykkja bóluefni AstraZeneca

Stella Kyriakides, sem stýrir heilbrigðismálum í framkvæmdastjórn ESB, á blaðamannafundi í dag. AFP

Lyfjastofnun Evrópu hefur veitt leyfi fyrir notkun bóluefnis AstraZeneca fyrir fólk eldra en átján ára. Ætla má að það verði gert í kjölfarið hér á landi nokkuð fljótlega.

Forstjóri Lyfjastofnunar sagði í samtali við mbl.is fyrr í dag, að náist það ekki í dag verði það vonandi gert á morgun.

„Það er fólk á vakt hjá okkur í dag og fram á kvöld. Ef þetta næst ekki í dag þá verðum við að halda áfram á morgun. Þetta fer allt eftir því hvaða upplýsingar koma frá Lyfjastofnun Evrópu og hvenær, það eru þær tímasetningar sem við erum að vinna með,“ sagði forstjórinn Rúna Hauksdóttir.

Frétt af mbl.is

Fá líklega leyfi hérlendis í dag eða á morgun

Standa í deilum á sama tíma

Samþykki stofnunarinnar kemur á sama tíma og Evrópusambandið stendur í harðvítugum deilum við AstraZeneca um ákvæði samnings þeirra í millum.

Framkvæmdastjórn Evrópusambandsins birti fyrr í dag ritskoðaða útgáfu af samningnum, í von um að sanna að fyrirtækið hafi brotið í bága við ákvæði samningsins um afhendingu bóluefnis við kórónuveirunni.

Framkvæmdastjórnin hefur brugðist illa við því að framleiðsluörðugleikar bitni einungis á afhendingu bóluefnis til sambandsins en ekki til Bretlands, en stjórnvöld þar í landi sömdu við framleiðandann þremur mánuðum á undan sambandinu.

Notaði fyrirtækið tímann til að leysa vandamál við framleiðslu og afhendingu frá verksmiðjum sínum í Bretlandi. Vandamál við framleiðslu í Belgíu hafa hins vegar valdið töfum á afhendingu til ríkja Evrópusambandsins.