Harma samþykkt landsfundar um ESB

Sjálfstæðir Evrópumenn harma samþykkt landsfundar Sjálfstæðisflokksins um Evrópumál. Segja þeir hana fela í sér áhrifaleysi flokksins í einhverjum mikilvægustu samningum sem Ísland hefur gengið til á þýðingarmesta tíma samningagerðarinnar. Þetta kemur fram í ályktun sem samþykkt var á fundi samtakanna í dag.

„Síðar á þessu ári hefjast formlegar samningaviðræður Íslands við Evrópusambandið um fulla aðild að sambandinu. Mikilvægt er að þjóðin gangi til þeirra viðræðna sem styrkust til þess að tryggja heildarhagsmuni sína. Breið pólitísk samstaða er líklegust til að skila góðri niðurstöðu fyrir Ísland.

Þjóðin er nú í alvarlegustu kreppu sem hún hefur lent í á lýðveldistímanum og því skiptir miklu að hún kanni til hlítar allar leiðir sem geta tryggt stöðugleika í framtíðinni.

Því harma Sjálfstæðir Evrópumenn samþykkt landsfundar Sjálfstæðisflokksins um Evrópumál. Hún felur í sér áhrifaleysi flokksins í einhverjum mikilvægustu samningum sem Ísland hefur gengið til á þýðingarmesta tíma samningagerðarinnar. Hún er einnig andstæð þeirri eðlilegu lýðræðiskröfu að fólkið í landinu fái úrslitavald um niðurstöðu málsins.

Aldamótanefnd Sjálfstæðisflokksins varaði á sínum tíma við því „að við séum sjálfir að búa okkur til skilyrði og mála skrattann á vegginn og þar með veikja okkar eigin samningsstöðu er við mætum með sjálfskapaða annmarka til viðræðna.“ Sjálfstæðir Evrópumenn taka undir þessa skoðun.

Við svo búið er brýnast að styrkja og breikka svo sem verða má pólitískan bakhjarl aðildarumsóknarinnar til sóknar og varnar íslenskum hagsmunum. Fundurinn felur stjórn samtakanna að vinna að því markmiði með öllum þeim málefnalegu ráðum sem best þykja duga meðan samningaviðræður standa. Endanleg afstaða til aðildar verði síðan tekin þegar ljóst verður hvað í mögulegum samningi felst," segir í ályktun fundar Sjálfstæðra Evrópumanna.

• 9 blogg um fréttina

Bloggað um fréttina

• Ingibjörg Guðrún Magnúsdóttir: Draga þessa umsókn til baka.
• Haraldur Haraldsson: Harma samþykkt landsfundar um ESB/þeir hafa fullt leifi til þessa/þetta …
• Páll Vilhjálmsson: ESB-aðild til áhrifaleysis
• Stefán Friðrik Stefánsson: Þora Evrópusinnar eða eru þeir bara að hóta?
• Ómar Bjarki Smárason: Stjórnmálaflokkur í jakkafötum....
• Óðinn Þórisson: 200 sjálfstæðir evrópumenn -
• Benedikta E: Æ - Æ - ! Hafa 200 sjálfstæðir ESB sinnar …
• Guðrún María Óskarsdóttir.: Nöldurseggir hins gamla markaðskerfis sem hrundi hér á landi.
• Guðmundur Jónas Kristjánsson: ESB-óværan enn í Sjalfstæðisflokknum. Ekki hjá okkur í Hægri grænum!