Bótakrafan 38 milljónir króna

eftir Steinþór Guðbjartsson

steinthor@mbl.is

STJÓRN Skógræktarfélags Reykjavíkur hefur beðið lögmann félagsins að leggja fram kæru á hendur Kópavogsbæ vegna umhverfisspjalla í Heiðmörk og er bótakrafan 38 milljónir króna.

Um 1.000 tré skemmd

Stefán P. Eggertsson, stjórnarformaður Skógræktarfélags Reykjavíkur, segir að stjórnin hafi fengið skógfræðinga hjá Skógræktarfélagi Íslands til að meta trjáskemmdirnar í Heiðmörk vegna lagningar vatnsleiðslu fyrir Kópavogsbæ. Þeir hafi komist að þeirri niðurstöðu að um 1.000 tré gæti verið að ræða og auk þess hafi þeir talið að gera ætti bótakröfu upp á 38 milljónir króna.

Fyrir viku lögðu Náttúruverndarsamtök Íslands fram kæru vegna umræddra umhverfisspjalla en þá ákvað Skógræktarfélag Reykjavíkur að verða við ósk Vilhjálms Þ. Vilhjálmssonar, borgarstjóra í Reykjavík, og fresta því í viku að leggja fram kæru. Þá sagðist borgarstjóri vilja finna lausn á málinu og var bjartsýnn á að sættir næðust.

Stefán P. Eggertsson segir að stjórn Skógræktarfélags Reykjavíkur efist ekki um góðan vilja borgarstjóra en ekki hafi verið ástæða til að draga það enn frekar að senda kæruna inn. Skógrækt ríkisins hefur líka lagt inn kæru.