Einingaverksmiðjan Borg ehf. í Kópavogi auglýsir ranglega í dagblöðum í dag að starfsemi hennar rúmist innan heimilda fyrirliggjandi starfsleyfis, segir í yfirlýsingu frá Kópavogsbæ í dag.

„Af því tilefni vekur Kópavogsbær athygli á eftirfarandi:

Einingaverksmiðjan Borg hefur aðeins leyfi til að reka „steypueiningaverksmiðju", eins og fram kemur í starfsleyfi hennar, enda var í  starfsleyfisumsókn fyrirtækisins dags. 5. desember 2005 einungis sótt um heimild til „framleiðslu forsteyptra eininga". Sala og dreifing Borgar á steinsteypu er á hinn bóginn óheimil og ólögmæt.

Einingaverksmiðjan Borg óskaði eftir starfsleyfi hinn 16. október 2007 til að „framleiða, selja og dreifa steinsteypu á almennum byggingamarkaði". Þeirri umsókn var hafnað.

Heilbrigðiseftirlit Hafnarfjarðar- og Kópavogssvæðis, sem gefur út starfsleyfi, segir í bréfi til Borgar dags. 9. nóvember 2007 að starfsleyfisumsókn fyrirtækisins hafi ekki gefið tilefni til þess að veitt væri víðtækara starfsleyfi. Í bréfi Heilbrigðiseftirlitsins dags. 28. nóvember 2007 segir að Borg sé óheimilt að stunda umrædda starfsemi. Í bréfi byggingarfulltrúa Kópavogsbæjar til Heilbrigðiseftirlitsins dags. 16. janúar 2008 segir að niðurstaða byggingarnefndar sé sú að rekstur Borgar samrýmist ekki samþykktri notkun húsnæðisins auk þess sem reist hafi verið mannvirki á lóðinni sem ekki er í samræmi við byggingarnefndarteikningar.

Þrátt fyrir þetta heldur Borg ehf. rekstri þessum áfram.

Íbúar í hverfinu hafa haft ama af mengun, ónæði og aukinni umferð sem af ólögmætri starfsemi Einingaverksmiðjunnar Borgar stafar. Kópavogsbær hefur því kært fyrirtækið til lögreglu.“