Lög um jafna stöðu: Vantar alls staðar konur

„Atvinnurekendur bera ábyrgð á kynbundnum launamun, ég svara því játandi, en eingöngu að hluta,“ segir Margrét Kristmannsdóttir, formaður Félags kvenna í atvinnurekstri. Margrét hélt erindi á ráðstefnu BSRB um aðferðir til að ná launajafnrétti sem haldin var í gær.

Hún nefnir þrjá sökudólga sem viðhalda kynbundnum launamun, en kýs að kalla þá launadragbíta. „Þeir eru fyrst og fremst gamaldags uppeldi, ónóg fræðsla og skortur á fyrirmyndum,“ segir Margrét og bætir við: „Mér finnst ótrúlegt að unga kynslóðin sé með mun meira gamaldags skoðun á hlutverkum kynjanna en við höfðum fyrir 20-30 árum.“

Launadragbítarnir

„Það að stelpur biðji um umtalsvert lægri laun en strákarnir er ótrúlegt,“ segir hún og bætir við að hluta skýringanna á því megi leita í klámvæðingunni, en stærri hluti

sé skortur á fyrirmyndum. „Það vantar alls staðar konur; í pólitík, í atvinnulífið, í stjórnir fyrirtækja og út um allt,“ segir hún og bætir við: „Helstu fyrirmyndir ungs fólks í dag eru ungir karlmenn í útrás með fangið fullt af peningum, þar hafa konur ekki sést.“

Margrét segir stjórnendur ráðningarskrifstofa verða að axla ábyrgð á því að þar sé kynjunum ekki mismunað. „Rannsóknir hafa sýnt að konur bjóða konum lægri laun, þannig eru allar líkur á því að strax við ráðningu myndist kynbundin slagsíða en á þessum ráðningarskrifstofum vinna aðallega konur.

Síðan er svo komið að okkur fyrirtækjarekendum, við þurfum að endurskoða heildarlaunin með mjög reglulegum hætti en það er ekki gert.“