Friðrik Sophusson. mbl.is/Ásdís

Ráðningarsamningur Friðriks Sophussonar, forstjóra Landsvirkjunar, hefur verið framlengdur til allt að tveggja ára.  Í ljósi gjörbreyttra aðstæðna fór stjórn fyrirtækisins þess á leit við Friðrik að hann héldi áfram störfum sem forstjóri og var sú niðurstaða samþykkt samhljóða af stjórn Landsvirkjunar.

Í sérstakri bókun um ákvörðunina er vísað til efnahagsástandsins í landinu nú um stundir:

„Landsvirkjun gegnir afar þýðingarmiklu hlutverki í uppbyggingu og rekstri framleiðslustarfseminnar í landinu og vegur rekstur fyrirtækisins þungt í fjármálum þjóðarinnar.  Í ljósi aðstæðna, sem nú eru uppi í efnahagsmálum og þjóðmálum, telur stjórn Landsvirkjunar brýnt að tryggja festu og samfellu í stjórn fyrirtækisins.  Við þessar aðstæður hefur orðið að samkomulagi milli stjórnar og núverandi forstjóra að framlengja gildandi ráðningarsamning um allt að tvö ár í samræmi við ákvæði 8. gr. samningsins.“

Friðrik Sophusson hefur verið forstjóri Landsvirkjunar frá árinu 1999.  Síðastliðið sumar tilkynnti hann stjórn áform sín um að láta af störfum í lok árs 2008.  Við þau tímamót leit stjórn Landsvirkjunar til þess, að framundan væri viðamikil undirbúningsvinna við endurmat á stefnu fyrirtækisins svo og endurskoðun á rekstrarfyrirkomulagi.  Færi vel á því að nýr forstjóri hæfi undirbúning þeirra verka.

Starf forstjóra var auglýst laust til umsóknar 1. september 2008 og var umsóknarfrestur síðan framlengdur til 26. september síðastliðinn.  Alls bárust 55 umsóknir og var fjöldi hæfra einstaklinga í hópi umsækjenda.  Ráðningarferlið var í eðlilegum farvegi og höfðu nokkrir umsækjenda verið kallaðir í viðtal, þegar aðstæður í þjóðfélaginu breyttust á svipstundu á þann veg, að augljóst var að meginviðfangsefni stjórnar og forstjóra næstu misseri yrði að tryggja festu og stöðugleika í rekstri sem og trausta eftirfylgni við undirbúning fyrirhugaðra virkjunarframkvæmda.

Við þessar aðstæður telur stjórn Landsvirkjunar afar brýnt að viðhalda traustum samskiptum við helstu viðskiptavini og lánardrottna fyrirtækisins.  Þar skipta persónuleg tengsl og góð viðskiptasambönd meginmáli.  Að vel athuguðu máli þótti stjórn Landsvirkjunar því sérstök efni standa til þess að fara fram á það við núverandi forstjóra að hann gæfi kost á framlengingu gildandi ráðningarsamnings.  Á þessum tíma er mikilvægt að nýta áfram reynslu og þekkingu núverandi forstjóra og telur stjórn Landsvirkjunar það best þjóna hagsmunum fyrirtækisins við úrlausn þeirra verkefna, sem nú eru framundan."