Bjarni Harðarson hefur ákveðið að segja af sér þingmennsku. Þetta kemur fram á bloggsíðu Bjarna og segist hann hafa tilkynnt formanni Framsóknarflokksins og skrifstofustjóra Alþingis þessa ákvörðun sína.
„Í gærkvöldi urðu mér á alvarleg mistök og vitaskuld hljóp hér pólitískur hiti með mig í gönur. Ég hef af þeirri ástæðu ákveðið að segja af mér þingmennsku enda hefur það ævinlega verið bjargföst sannfæring mín að menn eigi alltaf að axla ábyrgð á eigin gerðum. Um leið og ég kveð stuttan og viðburðaríkan þingferil óska ég samstarfsfólki mínu á þingi og í Framsóknarflokki allra heilla," segir Bjarni á bloggsíðunni.
Helga Sigrún Harðardóttir, skrifstofustjóri þingflokks Framsóknarflokksins, var í 3. sæti á framboðslista Framsóknarflokksins í Suðurkjördæmi í Alþingiskosningunum vorið 2007.