Skattar halda áfram að hækka og krónan helst veik

„Verkefnin eru það stór framundan að það verður ekki hjá því komist að hækka tekjuskattinn og óbeina skatta einnig á næsta ári,“ sagði Steingrímur J. Sigfússon fjármálaráðherra í samtali við Morgunblaðið í gærkvöldi.

Hann segir verkefnið framundan ærið en ekki sé hægt að setja fram nákvæma aðgerðaáætlun í ríkisfjármálum á árunum 2011 til 2013. „Hins vegar verður ramminn að vera skýr og vel undirbúinn þannig að það sé hægt að bregðast við aðstæðum eins og þær verða þegar ákvarðanir um einstaka þætti, hvort sem það er niðurskurður á útgjöldum eða hækkun skatta, verða teknar. Óvissan er ennþá mikil og það verður að greina stöðuna vandlega á meðan við göngum í gegnum þessa erfiðu tíma.“

Jóhanna Sigurðardóttir forsætisráðherra segir viðbúið að íslenskt efnahagslíf þurfi að búa við veika krónu og háa stýrivexti. Aðgerðir stjórnvalda á sumarmánuðum muni miða við að skapa aðstæður fyrir frekari lækkun stýrivaxta.

Í stöðugleikasáttmála stjórnvalda, sveitarfélaga og aðila vinnumarkaðarins er áhersla lögð á að tímasett áætlun um ráðstafanir í gengismálum verði ljós 1. ágúst um afnám gjaldeyrishafta. Markmiðið er að tryggja stöðugleika krónunnar og aflétta hömlum á nýrri fjárfestingu fyrir 1. nóvember. Á þeim tíma verði endurreisn bankakerfisins lokið. „Mín skoðun er samt sú að við munum um einhvern tíma, kannski of langan, búa við of veika krónu og svarið við því er bara eitt, að sækja um aðild að Evrópusambandinu,“ segir Jóhanna.

• 2009-2011 þarf að ná niður 128 milljarða halla · 58 með sköttum en 70 með niðurskurði · Áætlun í ríkisfjármálum lögð fram í dag