Of seint eftir fimm ár

Íslendingar fá ekki annað tækifæri til að kanna hvort skynsamlegra hefði verið að bregðast öðruvísi við hér á landi eftir 5 ár. Það verður of seint. Því er nauðsynlegt að nýta nú þegar allar færar leiðir til að vinna gegn neikvæðum afleiðingum efnahagskreppunnar á heilsu og félagslega stöðu til að forðast heilsubrest og hamla gegn aukningu útgjalda á sviði heilbrigðis- og félagsmála.

 Þetta er meðal þess sem kemur fram í nýrri skýrslu sem starfshópur á vegum heilbrigðisráðuneytisins hefur unnið um sálfélagslega velferð barna á tímum efnahagsþrenginga. Skýrslan var kynnt á ráðstefnunni Velferð íslenskra barna - sóknarfæri á umbrotatímum sem haldin er í dag.

Starfshópurinn sem skipaður var þann 21. janúar 2009 af þáverandi heilbrigðisráðherra Guðlaugi Þór Þórðarsyni skilaði tillögum um það hvernig best mætti verjast sálfélagslegum afleiðingum efnahagskreppunnar til Ögmundar Jónassonar heilbrigðisráðherra nýlega. Í öllu starfi hópsins var horft sérstaklega til reynslu annarra þjóða af svipuðu hruni og efnahagsþrengingum sem hér urðu á liðnu hausti.

Starfshópurinn hafði víðtæk samráð við fagaðila og fulltrúa félagasamtaka og lagði áherslu á að hugmyndir að aðgerðum væru framkvæmanlegar með sem minnstum tilkostnaði í ljósi þeirrar hagræðingar sem þegar er hafin í heilbrigðiskerfinu.

Skýrslan í heild

• 1 blogg um fréttina

Bloggað um fréttina

• Guðrún María Óskarsdóttir.: Aðgerða er þörf, og ekki er nóg að skrifa skýrslur, …