Hefji Icesave upp úr pólítskum skotgröfum
Merki Heimdalls
Stjórn Heimdallar hefur samþykkt ályktun um Icesave-frumvarp ríkisstjórnarinnar og eru þingmenn hvattir til að hefja málið upp úr skotgröfum og flokkapólitík.
Ályktunin er eftirfarandi:
„Heimdallur hvetur ríkisstjórnina til að draga andann djúpt í Icesave-málinu. Hafa verður hugfast að margt hefur breyst í heiminum frá því í október 2008 og ekki er sami þrýstingur og áhyggjur í heiminum vegna hugsanlegs allsherjarhruns á fjármálamörkuðum og var þá. Þær óréttlætanlegu aðgerðir, sem erlend ríki sýndu á þeim tíma og beindust m.a. með afar ósanngjörnum hætti gegn Íslandi, eiga rætur sínar að rekja til þess óvissuástands sem þá ríkti í heiminum. Íslenskir ráðamenn eiga ekki að gangast undir og aðlagast þeim afarkostum sem þjóðinni voru settir á þeim tíma og við stöndum enn frammi fyrir heldur berjast fyrir betri niðurstöðu í málinu. Núverandi samningur, sem farið er fram á ríkisábyrgð fyrir, er enda sambærilegur við að hugsanlegt dómsmál hefði farið á versta mögulegan veg.
Enn er mikið óunnið við að kynna málsstað Íslands í Icesave-málinu út á við. Heimdallur leggur til að í stað þess að afgreiða ríkisábyrgð á Icesave-málinu setji stjórnvöld málið í salt í bili og einbeiti sér þess í stað að því að kynna málsstað Íslands með skipulögðum hætti, einkum gagnvart þingflokkum, stjórnvöldum og fjölmiðlum í Evrópu. Í slíkri kynningu ber að leggja áherslu á þær byrðar og áhættu sem gert er ráð fyrir að örríkið Ísland axli, þá meðferð sem okkur var sýnd með setningu hryðjuverkalaga af hálfu breskra stjórnvalda og með hvaða hætti Alþjóðagjaldeyrissjóðnum hefur verið beitt í málinu.
Augljóst er að Icesave-málið er eitt stærsta mál sem íslenskt stjórnkerfi og íslenskir stjórnmálamenn hafa glímt við. Niðurstaða málsins mun hafa mikil áhrif á efnahagslegan styrk þjóðarinnar næstu áratugina og örlög komandi kynslóða í landinu. Það er því skýlaus krafa að allt verði gert sem í okkar valdi stendur til þess að berjast fyrir okkar málsstað og að kjörnir fulltrúar hefji málið upp úr skotgröfum og flokkapólitík á næstu misserum.“
