Árni Páll Árnason, félagsmálaráðherra, var sjálfur viðstaddur viðtöl við umsækjendur um umboðsmann skuldara.

Árni Páll Árnason, félagsmálaráðherra, var sjálfur viðstaddur viðtöl við þá tvo umsækjendur um embætti umboðsmanns skuldara sem boðaðir voru í viðtal 20. júlí sl. Einnig voru viðstaddir aðstoðarmaður ráðherrans, ráðuneytisstjórinn og framkvæmdastjóri ráðningafyrirtækisins STRÁ MRI.

Þetta kemur m.a. fram í skriflegum rökstuðningi félags- og tryggingamálaráðuneytisins fyrir skipan í embætti umboðsmanns skuldara. Ásta Sigrún Helgadóttir, annar umsækjendanna tveggja sem kallaðir  voru í viðtal óskaði eftir rökstuðningnum. Hann hefur nú verið birtur á heimasíðu ráðuneytisins.

Hinn umsækjandinn sem boðaður var í viðtal var Runólfur Ágústsson, sem var ráðinn. Hann sagði af sér í gærkvöldi, að kvöldi fyrsta dags síns í embætti.

Í frétt ráðuneytisins  segir að í kjölfar viðtalanna hafi ráðningarfyrirtækinu verið falið að gera ítarlegt hæfnismat á hvorum umsækjendanna fyrir sig. 

„Var þar tekið mið af almennum hæfisskilyrðum sem sett voru í auglýsingu um embættið, auk annarra málefnalegra sjónarmiða sem ráðuneytið taldi nauðsynlegt að leggja til grundvallar. Var sérstaklega litið til reynslu og þekkingar umsækjendanna sem nýst gætu í starfi, mat á leiðtogahæfni, sjálfstæði og fagmennsku í vinnubrögðum, hæfni í mannlegum samskiptum og færni til að tjá sig í ræðu og riti.

Horft var til frammistöðu umsækjenda í starfsviðtali og tekið mið af umsögnum um þá sem aflað hafði verið. Við mat á umsækjendum um embætti umboðsmanns skuldara var ekki litið til persónulegra fjárreiðna þeirra og í auglýsingu voru engar skilgreindar kröfur hvað það varðar enda þess ekki krafist í lögum um umboðsmann skuldara,“ segir m.a. í fréttinni.

Í skriflegum rökstuðningi til Ástu Sigrúnar kemur fram að Runólfur Ágústsson hafi verið metinn hæfasti umsækjandi. Þar segir m.a.:  „Runólfur Ágústsson var talinn best til þess fallinn að gegna embættinu og ákvað ráðherra því að skipa hann til að gegna því.“