Opnum prófkjörum verði hætt

Samfylkingin gætti ekki nægilega að því að haga vali á framboðslista þannig að ekki skapaðist hætta á að frambjóðendur ynnu gegn hagsmunum flokksins og hver gegn öðrum. Umbótanefnd flokksins leggur það meðal annars til að einungis skráðir flokksmenn geti tekið þátt í prófkjörum flokksins.

Þetta kemur fram í skýrslu umbótanefndarinnar, sem nú er til umræðu á flokkstjórnarfundi flokksins á Hótel Loftleiðum.

„Einstaklingur sem sækir stuðning til starfa á vegum flokksins út fyrir hann getur átt erfitt með að vera trúverðugur fulltrúi flokksmanna sem sjá hann þá miklu frekar sem fulltrúa stuðningsmanna sinna,“ segir í skýrslunni.

Sá sem sæki stuðning sinn til hópa utan flokksins geti sjálfur haft tilhneigingu til að líta svo á að ábyrgð sín sé fyrst og fremst gagnvart þeim, en ekki flokknum sjálfum.

Í skýrslunni er jafnframt bornar fram efasemdir um persónukjör. Þó mikill stuðningur sé við slíkt fyrirkomulag nú, geti það stuðlað að óeiningu með sama hætti og opin prófkjör.

• 4 blogg um fréttina

Bloggað um fréttina

• Jón Aðalsteinn Jónsson: Flokksræðið opinberað
• Gunnar Heiðarsson: Góð niðurstaða!!
• Ólafur Ingi Hrólfsson: Persónukjör
• Sigríður Laufey Einarsdóttir: Herferð gegn prófkjörum - og spillingu?