Sauðfé hefur sótt í garða Bolvíkinga efst í bænum og eru íbúar í hverfinu orðnir langþreyttir á heimsóknum ferfætlinganna, að því er framkemur á fréttavef Bolvíkinga. Þar er birtur fjöldi mynda af atgangi kindanna.
Kindurnar hafa verið sérlega aðgangsharðar í sumar og er lélegum girðingum og skorti á rörahliði m.a. kennt um. Þá er úthagi rýrari en oft áður vegna kulda fram eftir sumri.
Auk þess að éta gróður í húsagörðum hafa kindurnar lagt leið sína í kirkjugarða bæjarins og étið þar blóm af leiðum.