Á annan tug þúsunda verða án vinnu

„Yfirleitt dregur úr atvinnuleysi yfir sumarmánuðina, en svo eykst það aftur með haustinu, meðal annars vegna árstíðarsveiflu. Gera má ráð fyrir því að atvinnuleysi verði um 0,6%-0,8% minna í haust en haustið 2010.“

Þetta segir Friðrik Friðriksson, hagfræðingur hjá Vinnumálastofnun, spurður um horfur í atvinnumálum á landinu með haustinu.

„Gera má ráð fyrir því að atvinnuleysið verði nálægt 7,5% að meðaltali í ár og því 0,6 prósentustigum minna en síðasta ár. Síðustu 12 mánuði frá júlí í fyrra og fram í júní í ár var meðalfjöldi atvinnulausra um 12.700 eða að meðaltali 7,8%,“ segir Friðrik í umfjöllun um mál þetta í Morgunblaðinu í dag.

Má í þessu samhengi rifja upp þau ummæli Gissurar Péturssonar, forstjóra Vinnumálastofnunar, frá því í vor að ekki hafi sést jafn mikið atvinnuleysi á Íslandi og í jafn langan tíma síðan í kjölfar kreppunnar miklu 1929.