Undirbúningsframkvæmdir vegna Vaðlaheiðarganga hófust í gærmorgun. Verktakafyrirtækið G. Hjálmarsson hóf að grafa frá væntanlegum gangamunna Eyjafjarðarmegin. Verkið felst í því að gera veg frá göngunum sem fer á brú yfir hringveginn.
Unnið er að gerð verksamnings við ÍAV og Marti sem áttu lægsta tilboð í gerð Vaðlaheiðarganga. Því er ekki vitað hvenær borun ganganna hefst.
Framkvæmdir við veginn eru til undirbúnings aðalframkvæmdum. Verktakinn hreinsar moldarlag frá gangamunnanum og sprengir til að fá efni í veginn. Aðalverktakinn tekur síðan við og lýkur við gröft frá vinnusvæðinu. G. Hjálmarsson gerir undirstöður undir bráðabirgðabrú sem byggð verður yfir hringveginn.