Þungfært að perlum

Markaðsskrifstofa Norðurlands hefur óskað eftir því við Vegagerðina og innanríkisráðuneytið að fá reglulegan snjómokstur vega að helstu náttúruperlum svæðisins, t.a.m. Dettifossi og Goðafossi.

Erlendum ferðamönnum sem heimsækja svæðið hefur fjölgað umtalsvert í vetur og telja ferðamálafrömuðir að átakið Ísland - allt árið, sem ríkisstjórnin stendur fyrir í samvinnu við ferðaþjónustuna, sé til lítils ef aðgengi að helstu ferðamannastöðum er ekki jafnframt tryggt.

Í umfjöllun um mál þessi í Morgunblaðinu í dag telur Pétur Snæbjörnsson, hótelstjóri á Hótel Reynihlíð við Mývatn, reglur Vegagerðarinnar um snjómokstur hamla aukningunni.