Innlent | mbl | 12.12.2012 | 11:02 | Uppfært 11:45

Sökinni varpað á Íslendinga eina

Steingrímur J. Sigfússon, atvinnuvega- og nýsköpunarráðherra. mbl.is/Ómar Óskarsson

„Viðskiptaþvinganir munu ekki leiða til lausnar á þessari deilu. Fyrir velferð landsins okkar og Norður-Atlantshafsins verðum við að ná samkomulagi. Við erum reiðubúin að leggja okkar að mörkum,“ segir Steingrímur J. Sigfússon, atvinnuvega- og nýsköpunarráðherra, í grein sem birtist í bandaríska viðskiptablaðinu Wall Street Journal í dag, þar sem hann gerir að umtalsefni makríldeiluna við Evrópusambandið og Noreg.

Steingrímur gagnrýnir þar Evrópusambandið og Norðmenn meðal annars fyrir að ætla að taka sér 90% þess makrílkvóta sem vísindamenn hafa ráðlagt og ætla Íslendingum, Færeyingum og Rússum aðeins þau 10% sem eftir eru. Hann bendir á að öll ríkin sem koma að málinu séu í þeirri stöðu að geta gefið út einhliða makrílkvóta þar sem ekki liggi fyrir samningar um skiptingu stofnsins og fyrir vikið sé hætta til staðar á ofveiði.

„En í stað þess að leita að lausn sem skilar öllum sanngjörnum hlut varpa ákveðin ríki Evrópusambandsins sökinni á Ísland og heimta að það eitt dragi úr veiðum sínum. Umrædd ríki sambandsins hóta jafnvel viðskiptaþvingunum af hálfu þess eins og að halda íslenskum skipum frá höfnum og banna innflutning á afurðum sem leiða af makrílveiðum landsins,“ segir ráðherrann ennfremur.

Steingrímur bendir á að Íslendingar hafi lagt til að öll ríkin drægju úr makrílveiðum sínum sem næmi 15-20% en ekki hafi verið tekið undir það. Sem strandríki verði aðilar málsins að sinna sameiginlega og ábyrga lausn á því sem tryggi sjálfbærar veiðar. „Við verðum að finna sanngjarna og varanlega lausn. Einhliða nálgun mun aðeins leiða til ofveiði sem skaðar okkur öll.“

Grein Steingríms J. Sigfússonar