Vinnumarkaðsúrræði skila árangri

Um 75% þeirra sem skráðir voru hjá Vinnumálastofnun í atvinnuleit á árunum 2009-2013 voru í vinnu eða námi haustið 2013 samkvæmt niðurstöðum könnunar sem Vinnumálastofnun lét gera á aðstæðum þessa hóps. Markmiðið var að kanna stöðu hópsins og einnig viðhorf einstaklinga innan hans til mismunandi vinnumarkaðsúrræða, að því er segir í frétt á vef stofnunarinnar.

Fram kemur að stærstur hluti svarenda hafi verið í vinnu þegar könnunin var gerð eða 63,5% en þar af hafi 1,5% verið í fæðingarorlofi. Því til viðbótar voru tæplega 5% í vinnu samhliða námi og 8% í námi. Samtals voru því um 75,5% í vinnu og/eða námi.

Þá segir að ef þessi niðurstaða sé umreiknuð á þýðið megi áætla að tæplega 18.100 af 24.000 einstaklingum sem í hlut áttu hafi verið í vinnu og/eða námi haustið 2013.

Samkvæmt könnuninni má ætla að um 2.100 einstaklingar af heildinni hafi hætt þátttöku á vinnumarkaði á tímabilinu vegna aldurs, örorku eða langtímaveikinda. Um 200 einstaklingar voru í fæðingarorlofi.

Líkt og segir að ofan var þýði könnunarinnar um 24.000 einstaklingar sem skráðir voru í atvinnuleit á fyrrnefndu árabili en úrtakið var um 3.500 einstaklingar. Svarhlutfall var tæp 60%. Úrtakinu var skipt í sex 500 manna hópa.

Einstaklingar í fimm þessara hópa höfðu tekið þátt í einhverjum af eftirtöldum vinnumarkaðsúrræðum Vinnumálastofnunar, þ.e; Vinnandi vegi – Nám er vinnandi vegur – Liðsstyrk – ÞOR þekking og reynsla og Ungt fólk til athafna. Í sjötta hópnum voru einstaklingar sem höfðu notið einhverrar annarrar þjónustu Vinnumálastofnunar.

Um 15% hópsins eru hvorki virk á vinnumarkaði né í námi

Ennfremur segir að niðurstöður könnunarinnar sýni að um 15% þátttakenda séu hvorki virk á vinnumarkaði né í námi án þess að fyrir því séu tilgreindar ástæður. Nánari skoðun á aðstæðum þessa hóps hafi sýnt að karlar séu þar fleiri en konur, einstaklingar af erlendum uppruna séu þar fleiri en Íslendingar og flestir í þessum hópi séu 45 ára og eldri. Ósérhæft starfsfólk sé áberandi í þessum hópi og fólk sem áður hafi verið í störfum sem kröfðust ýmiss konar tæknikunnáttu. Niðurstöðurnar bendi einnig til þess að hlutfallslega fleiri í þessum hópi búi í leiguhúsnæði, í foreldrahúsum eða séu húsnæðislausir borið saman við fólk í hinum hópunum.

Loks segir að velferðarráðuneytið og Vinnumálastofnun muni skoða hvaða leiðir séu færar til að koma til móts við þennan hóp sem hvorki er virkur á vinnumarkaði né í námi.

• Blogga um frétt