Samtökin Scotch Whisky hafa sent Alþingi umsögn um frumvarp Vilhjálms Árnasonar sem felur í sér að gera sölu á áfengi frjálsa. Samtökin eru mótfallin því að sterkt áfengi eigi að fela í matvöruverslunum á meðan léttvín og bjór má vera fyrir allra augum.

Eins og nafnið ber með sér berjast samtökin (e. Scotch Whisky Association) fyrir hag viskíframleiðenda og standa 95% þeirra að baki samtökunum.

Í umsögninni er þeirri fyrirætlan fagnað að áfengissala verði gerð frjáls á Íslandi en ýmislegt í frumvarpinu sé hins vegar óboðlegt.

Sér í lagi er það eitt ákvæði frumvarpsins sem fer fyrir brjóstið á samtökunum, en í því er kveðið á um að áfengi sem er að rúmmáli meira en 22% af hreinum vínanda skuli geymt afmarkað frá annarri söluvöru á bak við afgreiðsluborð eða í sérrými innan verslunar.

Þetta segja samtökin að sé mismunun og fyrir henni séu engin rök gefin í frumvarpinu. Fara eigi eins með áfengi hvort sem það telst sterkt áfengi eða léttvín og bjór.

Þá er gagnrýnt að það komi ekki skýrt fram í frumvarpinu hvort sérverslanir með áfengi verði leyfðar, til dæmis sérstakar vískiverslanir með góðu úrvali og sérþekkingu starfsmanna.

Tengdar fréttir

Vín í verslanir

Segir vefverslunina mikil vonbrigði

• Segir vanrækslu ÁTVR „aðför að lýðheilsu ungmenna“
• Pósturinn dreifir áfengi fyrir Smáríkið
• Móta heildarstefnu í áfengis- og vímuvörnum
• „Ráðherrann er rangstæður“

» Fleiri tengdar fréttir

• 1 blogg um fréttina

Bloggað um fréttina

• Ásgrímur Hartmannsson: Ágætis hugmynd