Mennta- og menningarmálaráðherra hefur skipað Eyþór Laxdal Arnalds framkvæmdastjóra sem formann þjóðleikhúsráðs frá 1. febrúar nk.
Hann tekur við af Magnúsi Ragnarssyni sem lét af störfum snemma í janúar af persónulegum ástæðum. Magnús sagði í samtali við mbl.is í kjölfarið að starfið hefði samræmst illa öðrum skyldum.
Á vef mennta- og menningarmálaráðuneytisins segir að Eyþór Laxdal Arnalds sé Þjóðleikhúsinu að góðu kunnur og hafi ungur leikið í ýmsum leikritum m.a. í Þjóðleikhúsinu 1976-77.
Hann lauk burtfararprófi í sellóleik 1988 og tónsmíðanámi frá Tónlistarskólanum í Reykjavík sama ár. Eyþór hefur lokið MBA námi og stundað framhaldsnám í hagsögu við Harvard háskóla í Bandaríkjunum.
Þjóðleikhúsráð verður þannig skipað:
Eyþór Laxdal Arnalds, formaður.
Herdís Þórðardóttir varaformaður.
Ragnar Kjartansson.
Randver Þorláksson.
Agnar Jón Egilsson.