Vilborg Arna komst óhult niður í grunnbúðirnar á Everest í dag með björgunarþyrlu. Þetta kemur fram á Facebook-síðu hennar. Vilborg mun bíða átekta þar ásamt teymi sínu, en samband á svæðinu er afar slæmt og bíður fjölskylda hennar því frekari frétta. Ekki er ljóst hvort hún mun halda áfram upp fjallið eða ekki.
Annar Íslendingur, Ingólfur Ragnar Axelsson, er einnig staddur á fjallinu í fimm manna hópi, en á Facebook-síðu hans segir bróðir hans frá því að hópurinn komist í grunnbúðirnar á morgun með þyrlu. Í samtali við mbl.is í gær sagðist móðir Ingólfs llítið vita annað en að hann væri heill á húfi.
Vilborg hafði stutt samband við fjölskylduna til að láta vita að hún hafi komist óhult niður í Base Camp fyrr í dag með...
Posted by Vilborg Arna Gissurardóttir on Sunday, April 26, 2015
Heyrðum í Ingó Ingolfur Axelsson) áðan og það er gert ráð fyrir að bjarga þeim niður í grunnbúðir á morgun með þyrlum....
Posted by Bragi Rúnar Axelsson on Sunday, April 26, 2015
Jarðskjálfti upp á 7,9 á 15 kílómetra dýpi skók Nepal í gær og olli miklum skemmdum í höfuðborginni Katmandú. Snjóflóð áttu sér stað í kjölfarið við Everestfjall. Samkvæmt fréttum af svæðinu eru grunnbúðirnar mikið skemmdar.
Komið hafði fram á Facebooksíðu Vilborgar að hópurinn í fyrstu búðunum væri vel á sig kominn og hyggðist enn klífa tindinn. Þá kom jafnframt fram að þau myndu eyða næstu tveimur dögum í búðunum áður en haldið verður áfram með aðlögunarferðina og farið upp í næstu búðir. Ekki er þó ljóst hvort hún mun halda áfram ferðinni miðað við nýjustu fréttir.