Verkfallsaðgerðir Bandalags háskólamanna og Félags íslenskra hjúkrunarfræðinga hafa haft víðtæk áhrif á Landspítalann. Meðal annars hefur 500 aðgerðum verið frestað á Landspítalanum síðan verkfallsaðgerðirnar hófust og dag- og göngudeildarkomum hefur fækkað um 3.200.
Geislafræðingar, lífeindafræðingar og ljósmæður hafa verið í ótímabundnu verkfalli frá 7. apríl, sem hluti af aðgerðum BHM, og hafa verkföll því staðið yfir í átta vikur. Lífeindafræðingar mega þó sinna störfum eftir hádegi alla virka daga, og ljósmæður mega vinna á mánudögum og föstudögum. Utan þess vinnur starfsfólk samkvæmt undanþágulistum.
Hjúkrunarfræðingar hafa verið í ótímabundnu verkfalli í eina viku.
Eins og grafið hér að ofan sýnir hefur um 500 aðgerðum verið frestað á Landspítalanum síðan verkfallsaðgerðirnar hófust. Þá hefur dag- og göngudeildarkomum fækkað um 3.200. Innliggjandi sjúklingum hefur fækkað um 120, en í stað 680 rúma eru nú 560 í notkun.
60% myndgreiningarannsókna hefur verið frestað vegna verkfallanna og 50% blóðrannsókna. Yfirleitt eru framkvæmdar um 420 rannsóknir á dag en þær eru nú rúmlega 200 á dag. Í síðustu viku voru framkvæmdar 1.145 rannsóknir samanborið við 1.851 á sama tíma og í fyrra.
Þá hafa rúmlega tuttugu geislafræðingar sagt upp störfum á Landspítalanum eða um þrjátíu prósent allra þeirra geislafræðinga sem starfa á spítalanum, vegna álags sem að mestu stafa af verkfallsaðgerðunum.