Á annan tug bifhjólamanna kom saman fyrir utan Alþingishúsið í gær og mótmælti því að túlkasjóður heyrnarlausra væri uppurinn og þar með væru réttindi heyrnarlausra hér á landi skert. „Heyrnarlausir geta ekki látið í sér heyra en það gátu pústkerfin okkar,“ segir Davíð Bergmann Davíðsson, skipuleggjandi mótmælanna.
Í samtali við mbl.is segir Davíð heyrnarlausa lifa í „ósýnilega heiminum“ í íslensku þjóðfélagi og því hafi hann ákveðið að gera sitt besta til að vekja athygli á þeirra málstað, og því muni hann ekki hætta fyrr en heyrnarlausir öðlist full mannréttindi.
Davíð á heyrnarlausa systur og segist hafa orðið þess var að heyrnarlausir séu afar einangraðir í íslensku samfélagi. Kornið sem fyllt hafi mælinn var þegar hann hafi þurft að aðstoða systur sína við fasteignakaup. „Hún missti tvær draumaíbúðir á grundvelli þess að hún er fötluð,“ segir hann og heldur áfram: „Ég dreg þá ályktun því hún getur ekki farið í greiðslumat því túlkasjóðurinn er tómur.“
Davíð segist hafa fengið algjörlega nóg. „Systir mín er fjölskyldukona sem á börn en hún verður komin á götuna 1. ágúst því hún er búin að selja ofan af sér.“
Heyrnarlausir fá ekki endurgjaldslausa táknmálstúlkaþjónusta á tímabilinu 25. maí til 30. júní vegna þess að fjármagn sem ætlað er til að standa undir þjónustunni er uppurið. Davíð segir að í dag sé heyrnarskertum skammtað 8 til 10 klukkustundum af túlkaþjónustu á ári, og því sé það skítt að ná ekki einu sinni klukkutíma á mánuði.
„Hvernig myndir þú forgangsraða þínum mínútum af túlkun á mánuði? Skólaskemmtunina? Bankann? Erfðadrykkjuna? Skírn barnabarns? Brúðkaup dóttur þinnar? Íbúðarkaup?“
Davíð hefur verið fremstur í flokki mótmælenda og vakið athygli á þessu misrétti með táknrænum hætti síðustu daga. Hann mótmælti fyrir utan Alþingishúsið í síðustu viku með þrívíddargleraugu, bundið fyrir munninn og með heyrnatól. „Ég var með Iron Maiden og Slipknot í eyrunum svo ég heyrði ekki neitt og svo áttu þrívíddargleraugun að tákna það hvort ég gæti séð alþingismenn í réttu ljósi, því mér finnst þetta virkilega ljótt.“
Þá fór hann jafnframt og mótmælti í Norræna húsinu þar sem Fundur fólksins var haldinn og stjórnmálamenn og almenningur komu saman. „Ég fór upp á svið og gargaði hátt: „Hvers vegna buðuð þið ekki heyrnarlausum? Eru þau ekki fólk? Fjalla mannréttindi um peninga?““
Daginn eftir mætti Davíð að nýju með hóp heyrnarlausra í för með sér. Þar segir hann systur sína hafa gert einn flottasta gjörning sem hann hafi séð. „Hún stóð uppi á kassa og fór að tala við fólkið á táknmáli. Það var enginn sem túlkaði svo það skildi hana enginn. Hún var samt sem áður að segja mjög sára hluti um það hvernig það er að vera ekki hluti af samfélaginu.“
Loks mætti hann á mótmæli BHM og Félags hjúkrunarfræðinga á Austurvelli og keyrði fram hjá Alþingishúsinu á mótorhjóli með skilti á bakinu sem benti á að túlkasjóður heyrnarlausra væri uppurinn. Þandi hann hjólið vel svo eftir var tekið en þegar hann hafði lagt því hrópaði hann „Mannréttindi fyrir heyrnarlausa“ og var vel fagnað af mótmælendum.
Davíð segist hafa áttað sig á að þetta næði ekki eyrum fólks og því ákvað hann að efna til hávaðasamra mótmæla sem myndu svo sannarlega gera það. „Ég ákvað að skora á allt bifhjólafólk til að sýna stuðning. Við mættum í gær og þöndum græjurnar fyrir utan Alþingi og fyrir aftan okkur stóðu heyrnarlausir með mótmælaskilti.“
Segist hann vera kominn með ógeð á framkomu yfirvalda í garð fatlaðs fólks sem séu orðnir annars flokks þegnar. „Þetta er ógeðslegt. Við erum með minnihlutahóp sem fær ekki full mannréttindi og það er ekki í boði í íslensku samfélagi,“ segir hann og heldur áfram: „Við hættum ekki fyrr en heyrnalausir og heyrnaskertir fá full mannréttindi á Íslandi.“
Flottir mótorhjólamenn að styðja okkur Davíð Bergmann Davíðsson
Posted by Guðrún Ólafsdóttir on Monday, June 15, 2015
Fyrri fréttir mbl.is um túlkaþjónustuna:
„Mannréttindi fyrir heyrnarlausa“
Heyrnarlausum ítrekað mismunað