Tekin hefur verið ákvörðun um það innan velferðarráðuneytisins að endurskoða reglugerð sem snýr að daggæslu barna í heimahúsum. Ákvörðunin kemur í kjölfar frétta af tveggja ára gamalli stúlku sem slasaðist þegar heitt vatn helltist yfir hana er hún var í umsjá dagforeldris.
Mikil umræða skapaðist eftir að fréttin um stúlkuna birtist í síðustu viku, og margir hafa velt því fyrir sér hvernig börn sín eru tryggð. Bryndís Erlingsdóttir, móðir stúlkunnar, sagði að stórlega þyrfti að bæta tryggingar og öryggi hjá dagforeldrum en fjölskyldan hefur engar miskabætur fengið frá því slysið varð í febrúar á þessu ári.
Ingibjörg Broddadóttir, félagsráðgjafi og staðgengill skrifstofustjóra í velferðarráðuneytinu, segir að nauðsynlegt sé að endurskoða reglugerðina. „Þetta atvik ýtti undir það og nú er búið að taka ákvörðun um að reglugerðin verði endurskoðuð,“ segir hún. „Við tökum þessu mjög alvarlega og ráðherra vill eindregið að farið verði í þessa vinnu.“
Þá hefur ráðuneytið óskað eftir greinargerð vegna málsins frá sveitarfélaginu Árborg.
Í reglugerðinni kemur fram að dagforeldri skuli vera með slysatryggingu, en ekki er tiltekið nánar hvað skuli felast í henni. Sú trygging var sú eina sem dagforeldri litlu stúlkunnar sem slasaðist var með, en með slíkri tryggingu eru börn aðeins tryggð fyrir örorku eða dauða. Til að dekka slys af þessu tagi hefði dagforeldrið þurft að vera með sérstaka svokallaða frjálsa ábyrgðatryggingu, en engin ákvæði eru um slíka tryggingu í reglugerðinni.
Aðspurð um það hvort þessu verði breytt segir Ingibjörg að allar hliðar verði skoðaðar. „Það er ýmislegt í reglugerðinni sem við viljum gjarnan taka til skoðunar, til dæmis hvað felist í þessum tryggingum. Þetta verður allt skoðað og við erum byrjuð að kanna núna hvaða tryggingar dagforeldrar eru með.“
Reglugerðin, sem var gerð árið 2005, var sett með stoð í lögum um félagsþjónustu sveitarfélaga en verið er að endurskoða þau lög. Að sögn Ingibjargar mun nefndin sem vinnur við að endurskoða lögin einnig taka umræðu um daggæslu barna í heimahúsum og hlutverk félagsþjónustunnar hvað varðar umönnun þessa yngsta hóps.
Dagforeldrar starfa sem sjálfstæðir atvinnurekendur, en þurfa að fá leyfi hjá viðkomandi sveitarfélagi til að fá að starfa. Sveitarfélögin sem hafa umsjón og eftirlit með starfsemi dagforeldra, eru skyldug til að fara eftir ákvæðum reglugerðarinnar sem kveður eingöngu á um skyldu dagforeldra til að kaupa slysatryggingu vegna barnanna, en félög dagforeldra á hverjum stað eða dagforeldrarnir sjálfir geta eins og áður sagði keypt tryggingar umfram þetta.
Stærstu félög dagforeldra hér á landi eru Barnið og Barnavistun sem bæði eru á höfuðborgarsvæðinu, en félagsmenn beggja félaga hafa ábyrgðatryggingu. Samtök dagforeldra á Suðurlandi, sem dagforeldri litlu stúlkunnar var í, tryggja félagsmenn sína þó ekki á þennan hátt.
Um tvö þúsund börn eru í daggæslu hjá dagforeldrum á ári hverju samkvæmt upplýsingum frá Hagstofunni. „Dagforeldrar veita þjónustu og umönnun sem gerir foreldrum kleift að fara aftur út á vinnumarkaðinn. Það má ekki gera lítið úr þeirri góðu vinnu en það þarf að styrkja betur þessa þjónustu eða finna annað fyrirkomulag,“ segir Ingibjörg að lokum.