Það er þolinmæðisverk að ná mynd, eins og þessari sem hér sést af haferninum, eins og Gyða Henningsdóttir ljósmyndari fékk að reyna í fyrradag. Hún og eiginmaður hennar, Einar Guðmann, sitja um hreiðrin dag eftir dag, allt upp í fjórtán tíma samfleytt, saman á óþægilegum kollum í litlu felulituðu einmenningstjaldi. Biðin er til þess að fá stuttan glugga, kannski þriggja sekúndna langan, þegar hægt er að mynda örninn að færa ungunum mat. Hann veiðir ekki á hverjum degi og þegar hann fiskar ekki gildir hið sama um þau.
Hægt er að fylgjast með þeim á síðunum gyda.is og gudmann.is. Einar segir að myndataka við arnarhreiður sé háð sérstöku leyfi og er unnin í samstarfi við Náttúrufræðistofnun.
Aðspurð um hvað fái fólk til þess að gera þetta segir Gyða það fyrst og fremst áhugann á ljósmyndun sem laði þau að. „Það hjálpar líka til, sérstaklega í þessari löngu yfirlegu yfir haferninum, að við erum í þessu saman. Það munar miklu um það. Maður gæti þetta, held ég, ekki aleinn.“
Blaðamaður spyr hvort það taki ekki á sambandið að sitja svona lengi yfir þessu og Gyða neitar því ekki. „Það tekur vel á. Það er þröngt um okkur svo það er eins gott að það sé gott samkomulag í tjaldinu. Sem betur fer er ég ekki há í loftinu svo það fer ekki mikið fyrir mér, a.m.k. stærðarlega séð,“ segir Gyða og hlær. „En þetta tekur vel á.“
Náttúruljósmyndun er ekki eina viðfangsefni Gyðu, en dags daglega vinnur hún sem rekstrarstjóri Levi's- og Benetton-verslana á Akureyri. „Sumum finnst maður stórfurðulegur að standa í þessu.“
Þau hjónin leggja mikið upp úr því að ljósmyndunin sé eins ekta og mögulegt er. Hún tæki það ekki í mál t.d. að mynda handfóðraða erni eins og gert er sums staðar. „Þetta þarf að vera alvöru, annars telur það ekki.“