Tugir matarboða hafa verið haldnir undanfarið víða um land í tengslum við verkefni Rauða krossins, Brjótum ísinn, bjóðum heim.
Í því felst að Íslendingar bjóða innflytjendum heim til sín eina kvöldstund til kvöldverðar og samveru og hefur beiðnum um að taka þátt í verkefninu fjölgað mjög undanfarnar vikur.
„Hugsunin á bak við verkefnið er að innflytjendur kynnist Íslendingum á þeirra heimavelli. Við höfum milligöngu um þetta matarboð og svo er það alfarið í höndum fólks hvert framhaldið verður og hvort það verða til vinatengsl sem vara lengi,“ segir Bergþóra Björk Guðmundsdóttir, verkefnastjóri hjá Rauða krossinum í Kópavogi, í umfjöllun um mál þetta í Morgunblaðinu í dag.