Erlendum karlmanni, sem grunaður er um umfangsmikil fjársvik og um hafa undir höndum mikið magn barnakláms, verður gert að sæta áfram gæsluvarðhaldi fram til 5. nóvember, en Hæstiréttur staðfesti í dag úrskurð Héraðsdóms Reykjaness frá 29. október þess efnis.
Frétt mbl.is: Grunaður fjársvikari með barnaklám
Maðurinn á sér nokkra sögu fjársvika erlendis og segir lögregla hann vera grunaðan um umfangsmikil auðgunarbrot hér á landi. Að mati lögreglu sé hann „vanaafbrotamaður sem lætur sér ekki segjast og hafi sýnt það í verki að hann hafi og muni halda brotum sínum áfram verði honum ekki gert að sæta gæsluvarðhaldi á nýjan leik,“ sagði í frétt mbl.is um miðjan september, þegar Hæstiréttur hafði staðfest fyrri gæsluvarðhaldsúrskurð yfir manninum.
Lögreglan hefur frá í júní sl. haft til rannsóknar mál er varða ætlaða refsiverða háttsemi mannsins. Annars vegar ætluð fjársvik í farmiðakaupum og hins vegar ætlaða vörslu og dreifingu á myndum og myndböndum sem sýni börn á kynferðislegan eða klámfenginn hátt.
Maðurinn hefur sætt gæsluvarðhaldi frá 12. ágúst sl.