Einar Ágústsson, sem ákærður er fyrir fjársvik upp á rúmlega 74 milljónir, skjalafals og brot á lögum um gjaldeyrismál lýsti sig saklausan af öllum ákæruliðum við þingfestingu málsins í dag. Lýsti hann bæði yfir persónulegu sakleysi sem og sakleysi vegna félagsins Skajaquoda ehf. sem maðurinn var í forsvari fyrir.
Þá hafnaði Einar bótakröfum sem höfðu verið lagðar fram í málinu sem einkaréttarkröfur, en einstaklingar og félag höfðu greitt honum 74 milljónir í þeirri trú að um fjárfestingasjóð væri að ræða. Í ákæru saksóknara kemur aftur á móti fram að ekkert bendi til að svo sé og að telja megi fjármunina glataða.
Frétt mbl.is: Kærður fyrir 74 milljóna fjársvik
Málinu var svo frestað um 6 vikur, en verjandi Einars hefur þann tímaramma til að skila inn greinargerð í málinu.
Málinu fylgir gríðarlegt magn gagna, en saksóknari lagði fram átta skjalamöppur, þar af eina með rafrænum gögnum á geisladiskum. Sagði verjandi við þingfestinguna að honum skildist að gögnin væru um 3 þúsund blaðsíður.
Það er því ljóst að málið er mjög umfangsmikið, en ákærði er í málinu er sagður hafa sent brotaþolum reglulega upplýsingar um góða ávöxtun fjármunanna. Gerði hann það meðal annars með að senda þeim mánaðarleg yfirlit þess efnis. Þá bjó Einar einnig til „fréttabréf“ sem var stílað á „sjóðsfélaga“ á árinu 2012, en þar var fjallað um sjóðinn og starfsemi hans. Í lokabréfinu var fjallað um slit sjóðsins. Segir í ákærunni að telja megi fé brotaþola með öllu glatað.
Í gjaldeyrishluta ákærunnar er maðurinn ákærður fyrir að hafa millifært samtals 220 milljóir króna frá október 2011 til júlí 2013 á reikninga félaganna Skajaquoda Group inc, Skajaquoda capital LLC eða Likenia inc. í Bandaríkjunum. Voru fjármunirnir teknir af reikningi tveggja íslenskra félaga sem Einar stýrði. Á bak við greiðslurnar voru ekki kaup á vöru, þjónustu eða öðru sem lög um gjaldeyrismál heimila.