Lárus Welding, fyrrum bankastjóri Glitnis, Jóhannes Baldursson, fyrrum framkvæmdastjóri markaðsviðskipta og Jónas Guðmundsson, Valgarð Már Valgarðsson og Pétur Jónasson, sem allir voru starfsmenn eigin viðskipta bankans Glitnis sem ákærðir eru fyrir markaðsmisnotkun og Lárus einnig fyrir umboðssvik lýstu sig allir saklausir við þingfestingu málsins í Héraðsdómi Reykjavíkur í morgun.
Lárus er ákærður fyrir markaðsmisnotkun og umboðssvik en hinir fjórir fyrir markaðsmisnotkun.
Fyrirtaka í málinu fór fram í Héraðsdómi Reykjavíkur í morgun. Málinu var því næst frestað til 15. júní en tveir ákærðu, Jónas og Valgarð, eiga eftir að velja sér verjanda og þá áttu lögmenn eftir að kynna sér gögn málsins betur.
Boðuð er yfirheyrsla á 73 vitnum í málinu.
Viðskipti Glitnis með eigin bréf fólu í sér langvarandi, stórfellda og ólögmæta íhlutun í gangverki verðbréfamarkaðarins þannig að gengi hlutabréfa Glitnis stjórnaðist ekki af markaðslögmálum.
Var genginu handstýrt af starfsmönnum bankans og uppsöfnuð bréf svo seld áfram til valinna viðskiptavina, m.a. stjórnenda bankans, þar sem viðskiptin byggðust á blekkingum og sýndarmennsku til að geta haldið áfram með markaðsmisnotkunina. Þetta kemur fram í ákæru embættis héraðssaksóknara í markaðsmisnotkunarmáli Glitnis sem ákært var fyrir í vikunni.
Deild eigin viðskipta Glitnis kom á tímabilinu 1. júní 2007 til 26. september 2008 að viðskiptum í meira en helmingi tilfella þegar um var að ræða kaup á bréfum í bankanum sjálfum í sjálfvirkum pörunarviðskiptum í Kauphöllinni.
Á sama tíma seldi deildin aðeins 1,2% af veltunni á sama hátt en meirihlutinn var seldur í stórum utanþingsviðskiptum til valinna viðskiptavina þar sem bankinn sjálfur fjármagnaði viðskiptin.
Frétt mbl.is: Handstýrðu gengi Glitnis