Símalínur hafa verið rauðglóandi hjá ferðaskrifstofunni Vita í morgun og biðu fjölmargir tölvupóstar starfsfólksins þegar það kom til vinnu. Íslendingar í Frakklandi vilja vera áfram og fylgjast með leik Íslands og Englands á mánudaginn og aðrir vilja ólmir komast út.
Sala er hafin í ferð á vegum Heimsferða, Icelandair kannar hvort hægt sé að bæta við auka vél; sem og WOW air.
„Það er kominn ofboðslegur fjöldi af fyrirspurnum, síminn logar. Það er verið að vinna í því að setja upp aukaferð og koma öllum fyrir sem vilja vera áfram,“ segir Steinþóra Sigurðardóttir, sölustjóri Vita, í samtali við mbl.is. Mikið álag hefur verið á íþróttadeild fyrirtækisins í morgun og hafa starfsmenn úr öðrum deildum komið til til aðstoðar.
Hér má lesa um miðasöluna á leikinn
Eins og staðan er núna liggur ekki fyrir hvort fyrirtækinu takist að útvega auka flugvél til að flytja áhugasama út en þegar er kominn biðlisti, gangi það upp.
„Ef þetta dettur inn, þá erum við komin með fullt af fólki á skrá. Þar gildir bara fyrstur kemur fyrstur fær. Við bendum fólki bara á að senda póst á þetta netfang og ef þetta gengur upp verður hringt í þá sem sendu,“ segir hún og bætir við að margir hafi sent fyrirspurnir í gærkvöldi og í nótt. Um er að ræða netfangið tonsport@vita.is.
Heimsferðir eru þessa stundina að undirbúa beint flug til Nice í Frakklandi þar sem leikur Íslands og Englands fer fram. Flogið út að morgni sunnudagsins 26. júní og heim aftur til Íslands um hádegi á þriðjudag. Gert er ráð fyrir að vélin taki tæplega tvö hundruð farþega og eru bókanir þegar farnar að berast í gegnum heimasíðu Heimsferða.
Guðjón Arngrímsson, upplýsingafulltrúi Icelandair, sagði í samtali við mbl.is í gærkvöldi eftir að ljóst var að Íslands var komið í sextán liða úrslit EM í knattspyrnu karla að reynt yrði að bregðast við með einhverjum hætti til að koma sem flestum út sem hafa áhuga á leiknum.
Benti hann á að Icelandair sé þegar með þrjú til fjögur flug á dag til Parísar auk þess sem félagið fljúgi til Brussel, Barselóna, Mílanó, Genfar og fleiri evrópskra borga. „Síðan munum við væntanlega reyna að bæta við flugferðum eins og hægt verður. Það þarf ekki mikinn sérfræðing til þess að sjá það er mikill áhugi á þessum leik og við munum að sjálfsögðu gera allt sem við getum til þess að bregðast við því,“ sagði Guðjón.
Guðjón sagði í samtali við mbl.is að ekki lægi fyrir hvort og þá hversu mörgum ferðum yrði bætt við.
Bein flugferð WOW air til Nice í Frakklandi á sunnudaginn seldist upp í gærkvöldi en á mánudagskvöldið keppir íslenska landsliðið þar við hið enska í 16-liða úrslitum Evrópumeistaramótsins í knattspyrnu. Upplýsingafulltrúi WOW air segir augljóslega mikinn áhuga á því að komast út á leikinn.
„Það er uppselt til Nice á sunnudaginn en við erum með ferð til Lyon á laugardaginn,“ segir Svanhvít Friðriksdóttir, upplýsingafulltrúi WOW air, í samtali við mbl.is. „Síðan erum við að vinna í því að bæta við vél til Nice, líklega á mánudeginum.“
Þar að auki flýgur WOW air til Parísar daglega.
Netverjar vöktu athygli á því að flugferðin til Nice hafði hækkað mikið í verði í gærkvöldi og var komin upp í 99.999. Til samanburðar kostar ferðin til Nice í dag, fimmtudag, 27.999 krónur. Spurð um verðið segir Svanhvít það eðlilegt að miðaverðið hækki þegar aðsóknin er svona mikil.
Á vef Túrista er fjallað um nokkrar mismunandi leiðir til að komast til Nice í Frakklandi.
Frétt mbl.is: Sala á leikinn hefst kl. 12