Íslendingar munu mæta Frökkum í fjórðungsúrslitum Evrópumótsins á sunnudaginn, eftir glæsilegan sigur á Englendingum í kvöld. Leikurinn fer fram á þjóðarleikvangi Frakka, Stade de France, þar sem Íslendingar sigruðu Austurríkismenn í riðlakeppninni.
Klara Bjartmarz, framkvæmdastjóri KSÍ, á von á því að miðasalan fyrir leikinn verði með sama móti og fyrir leikinn gegn Englandi; allir geti keypt miða, óháð þjóðerni. Íslendingar sem ætla sér að mæta á völlinn, verða því að sætta sig við biðröð á heimasíðu UEFA á ný og vona það besta.
Stade de France tekur rúmlega 81.000 áhorfendur, en Allianz Riviera-leikvangurinn í Nice, sem leikið var á í kvöld, tekur einungis rúmlega 35.000. Íslendingar ættu því að eiga betri möguleika á að næla sér í miða á leikinn á sunnudag, en þó ber að hafa í huga að íslensku strákarnir munu etja kappi við gestgjafana og eftirspurnin eftir miðum því væntanlega gríðarleg.
Miðasalan fer sem áður fram á vefsíðu UEFA, en hana má finna hér. Miðaverðið hefur hækkað frá því í sextán liða úrslitunum, en sem fyrr eru fjórir verðflokkar. Miðarnir kosta nú 45, 85, 135 eða 195 evrur, eða um 6.200, 11.600, 18.500 eða 26.800 krónur.