Kjaradeila flugumferðarstjóra og Isavia fer nú fyrir gerðardóm, eftir að flugumferðarstjórar felldu kjarasamninginn í atkvæðagreiðslu. Gerðardómur hefur boðað deiluaðila á fund sinn á miðvikudag, þar sem þeim gefst kostur á að skila inn greinargerð í málinu.
Guðni Sigurðsson, upplýsingafulltrúi Isavia, segir í samtali við mbl.is það vonbrigði að kjarasamningurinn hafi verið felldur. „Við vorum bjartsýn á að þetta yrði samþykkt.“
Kosningu félagsmanna í Félagi flugumferðarstjóra lauk á miðnætti. 60,2% greiddu atkvæði gegn samningnum en 39,8% vildu samþykkja hann. Var samningurinn því felldur. Um níutíu prósent félagsmanna tóku þátt í atkvæðagreiðslunni.
Frétt mbl.is: Flugumferðarstjórar felldu samninginn
Samninganefndir deiluaðila, flugumferðarstjóra og Samtaka atvinnulífsins fyrir hönd Isavia, skrifuðu undir kjarasamninginn í húsakynnum ríkissáttasemjara fyrir rúmri viku, eftir löng og ströng fundahöld. Átti samningurinn að gilda til ársloka 2018.
Var samningurinn kynntur félagsmönnum síðasta þriðjudag og í kjölfarið var kosið um hann. Lágu niðurstöðurnar fyrir í morgun.
Alþingi setti í síðasta mánuði lög á yfirvinnubann flugumferðarstjóra. Samkvæmt lögunum var gerðardómi gert að útkljá kjaradeiluna hefðu deiluaðilar ekki náð samningum fyrir 24. júní síðastliðinn. Skal gerðardómur þá ákveða kaup og kjör flugumferðarstjóra fyrir 18. júlí næstkomandi. Ákvarðanir gerðardóms skulu vera bindandi með sama hætti og um kjarasamning milli aðila væri að ræða og með gildistíma sem gerðardómur ákveður.
Gerðardómur skal við ákvarðanir um laun og önnur starfskjör flugumferðarstjóra fyrst og fremst taka mið af launaþróun samkvæmt þeim kjarasamningum sem gerðir hafa verið á almennum vinnumarkaði síðustu misseri.