Lögreglan í Stokkhólmi í Svíþjóð hefur nú handtekið mann fyrir aðild að morðinu á íslenskum karlmanni í vesturhluta borgarinnar á mánudaginn í síðustu viku.
Karlmaðurinn íslenski fannst blóðugur á tjaldstæði í borginni og staðfesti lögregla að hann hefði látist á sjúkrahúsi síðar sama dag.
Sjá frétt mbl.is: Íslenskur maður myrtur í Svíþjóð
Í svari lögreglunnar í Stokkhólmi við fyrirspurn Morgunblaðsins segir að búið sé að handtaka karlmann sem fæddur er árið 1978, og að hann hafi verið úrskurðaður í gæsluvarðhald fyrir aðild að morðinu.
Í frétt Aftonbladet segir að vitni segi manninn hafa verið stunginn fimmtán sinnum og sleginn ítrekað með járnstöng. Haft var eftir vitni að mennirnir hafi rifist um dulkóðuð tölvugögn í aðdraganda árásarinnar.