Innanríkisráðuneytið hefur sett Boga Nilsson, fyrrverandi ríkissaksóknara, til að gegna embætti ríkissaksóknara í máli tveggja manna sem kærðu Öldu Hrönn Jóhannsdóttur, yfirlögfræðing á skrifstofu lögreglustjórans á höfuðborgarsvæðinu, fyrir meint brot í starfi í LÖKE-málinu svokallaða.
Þetta kemur fram í frétt á vef Ríkisútvarpsins. Hlutverk Boga verður að fela löghæfum manni að fara með málið sem héraðssaksóknari og að fara með stjórnunar- og eftirlitsheimildir.
Áður hefur komið fram að embætti héraðssaksóknara og ríkissaksóknara hafa lýst sig vanhæf til meðferðar mála mannanna.
Annar kærenda er Gunnar Scheving Thorsteinsson lögreglumaður og hinn er fyrrverandi starfsmaður fjarskiptafyrirtækisins Nova.
Mennirnir kærðu Öldu fyrr í mánuðinum fyrir rangar sakargiftir og brot í starfi og krefjast þeir þess að hún verði svipt embætti og lögmannsréttindum.
Gunnar var sakfelldur í Hæstarétti Íslands fyrir að hafa greint vini sínum frá því á Facebook að hann hafi verið skallaður af ungum dreng við skyldustörf. Gunnari var ekki gerð refsing í málinu en hann var upphaflega grunaður um að hafa flett upp konum í LÖKE og deilt upplýsingum um þær í lokuðum Facebook-hópi með fyrrnefndum starfsmanni Nova og lögmanni.