„Hvað varðar kynbundinn launamun eru það viss vonbrigði að sjá þessa niðurstöðu. VR konur eru launalausar 36 daga á ári,“ segir Ólafía B. Rafnsdóttir, formaður VR. Hún var gestur Kristjáns Kristjánssonar í þættinum Sprengisandi á Bylgjunni í morgun.
Árleg launakönnun meðal félaga VR sem birt var á fimmtudag var til umræðu í þættinum. Í könnuninni kemur meðal annars fram að kynbundinn launamunur minnkar ekki milli ára. Ef litið er til grunnlauna eru konur með 12,2% lægri laun en karlar og þegar búið er að taka tillit til annarra þátta sem hafa áhrif á launin situr eftir 9,9% kynbundinn munur á grunnlaunum.
Sjá frétt mbl.is: Kynbundinn launamunur óbreyttur
Ólafía segir þessa stöðu óásættanlega og setti upp annað dæmi, máli sínu til stuðnings. „VR konur ættu að hætta í sinni vinnu klukkan hálfþrjú því þær eru launalausar eftir það.“
Ólafía benti einnig á að í efnahagslegri uppsveiflu virðist sem svo að launamunur kynjanna aukist en minnki í niðursveiflu.
Hún leggur til að gerð verði fræðileg úttekt á launamun kynjanna og af hverju hann stafar. „Mannauður er auðlind sem við erum ekki að nýta eins og við eigum að gera.“