Ekkert eftirlit var haft með lyfjagjöf mannsins, sem ákærður er fyrir að hafa myrt karlmann á sextugsaldri í búsetukjarna fyrir geðfatlaða við Miklubraut þann 22. október í fyrra. Þetta kom fram í skýrslutökum í aðalmeðferð málsins í vikunni, að því er segir í Fréttablaðinu.
Fram hafi komið við aðalmeðferð að fundist hefði mikið magn þeirra lyfja, sem maðurinn hefði átt að taka, í herbergi hans, og að gleymst hefði að læsa hnífaskúffu þeirri sem geymdi morðvopnið. Myndir í dómskjólum hafi auk þess greinilega sýnt að neysla fíkniefna hafi átt sér stað innan veggja búsetukjarnans.
„Þetta er auðvitað heimili fólks en ekki heilbrigðisstofnun. Það er mikilvægt að hafa það í huga. Í einhverjum tilvikum er verið að fylgjast með því hvernig fólk tekur lyfin sín en það er alfarið undir stjórn eða áætlun sem heilbrigðisstofnun eða læknir setur fram,“ er haft eftir Stefáni Eiríkssyni, sviðsstjóra velferðarsviðs Reykjavíkurborgar í samtali við Fréttablaðið í dag.
Maðurinn, sem er 39 ára, er ákærður fyrir að hafa stungið mann á sextugsaldri 47 sinnum með hnífi, eins og mbl.is hefur áður greint frá.
Manndrápið átti sér stað að kvöldi fimmtudagsins 22. október í fyrra, en báðir mennirnir bjuggu í húsinu. Í ákærunni kemur fram að hnífurinn hafi meðal annars gengið inn í hjarta og lifur mannsins sem hlaut bana af.
Auk refsingar vegna manndrápsins gerir ríkissaksóknari kröfu um að maðurinn sæti öryggisgæslu á viðeigandi stofnun. Einkaréttarkrafa er einnig uppi í málinu og hljóðar upp á þrjár milljónir króna í skaðabætur.
Dómur verður kveðinn upp í byrjun nóvember.