Hæstiréttur hefur staðfest 16 ára fangelsisdóm Héraðsdóms Vesturlands yfir Gunnari Erni Arnarsyni, sem varð Karli Birgi Þórðarsyni að bana í heimahúsi á Akranesi í október í fyrra.
Gunnar Örn var sakfelldur fyrir að manndráp. Árásin átti sér stað á heimili á Akranesi 2. október í fyrra en Karl lést fimm dögum síðar. Gunnar er dæmdur fyrir að hafa hert að hálsi Karls með höndunum og með því að bregða beltisól og fatareim um hálsinn á honum og herða að. Þar með talið með því að binda hnút á reimina svo hún losnaði ekki frá hálsinum, og stuttu síðar með því að bregða reiminni að nýju um hálsinn á Karli Birgi og herða að, eftir að endurlífgunartilraunir voru hafnar.
Gunnar Örn neitaði sök, en hann var talinn hafa verið í óminnisástandi vegna neyslu áfengis og lyfja þegar hann banaði Karli Birgi.
Frétt mbl.is: 16 dómur fyrir manndráp
Gunnar Örn hafði farið fram á að dómur héraðsdóms yrðir ómerktur af því að mat héraðsdóms á munnlegum framburði hans hafi verið rangur. Hæstiréttur bendir í úrskurði sínum á að í þeim dómi komi fram að framburður Gunnars hafi frá upphafi verið ruglingslegur og á reiki um aðdraganda þess að Karl fannst meðvitundarlaus og með reim um hálsinn á heimili Gunnars.
„Hann hafi einnig orðið margsaga í fjölmörgum og veigamiklum atriðum um atburði þá sem urðu á heimilinu þennan dag, auk þess sem framburður ákærða beri þess skýr merki að hann hafi leitast við að laga framburðinn að nýjum upplýsingum eftir því sem þær komu fram,“ segir í dómi Hæstaréttar.
Gunnar Erni var einnig gert að greiða fyrrum sambýliskonu Karls Birgirs 800.000 kr. miskabætur.